Angli / Një burrë rreth të 40-ave ka ndarë në mënyrë anonime historinë e tij, duke rrëfyer se ndodhet mes fajit dhe frikës për të humbur njeriun që do. Pas gati dhjetë vitesh lidhje, marrëdhënia e tij me partneren ka kaluar periudha të vështira, me konflikte dhe ndjesinë e mungesës së vlerësimit nga të dyja palët.
Gjatë një prej këtyre momenteve të tensionuara, ai pranon se e tradhtoi partneren me ish-të dashurën. Ajo e zbuloi tradhtinë, u përball me dhimbje të madhe, por pas bisedash të gjata dhe lotësh, vendosi ta falte dhe t’i jepte lidhjes një shans të dytë.
Ajo që gruaja nuk di, sipas rrëfimit të tij, është se kjo nuk ishte e vetmja herë. Burri thotë se ka pasur edhe disa marrëdhënie të tjera të rastësishme, pa ndjenja, por sot ndihet i konsumuar nga faji dhe mungesa e ndershmërisë.
Partnerja e tij i ka thënë se dëshiron të dijë gjithçka, për njё fillim tёrёsisht tё ri dhe për të rindërtuar besimin. Ai, nga ana tjetër, është i dyzuar mes dy frikërave: t’i tregojë të vërtetën dhe ta shkatërrojë lidhjen, ose të heshtë dhe të jetojë me ankthin se një ditë e vërteta mund të dalë në dritë.
Ekspertët e marrëdhënieve në çift theksojnë se situata të tilla nuk kanë zgjidhje të thjeshta. Ndërsa ndershmëria është thelbësore për besimin, zbulimi i plotë i tradhtive të shumta mund të shkaktojë një dhimbje të pakthyeshme. Nga ana tjetër, fshehja e së vërtetës mbart rrezikun e një tradhtie edhe më të madhe nëse zbulohet më vonë.
Psikologët sugjerojnë që, përpara çdo vendimi, personi të reflektojë mbi arsyet që e kanë shtyrë drejt tradhtisë dhe të kërkojë ndihmë profesionale, për të kuptuar modelet e sjelljes dhe për të ndërtuar mënyra më të shëndetshme për të përballuar krizat në çift.
Në fund, zgjedhja mbetet personale: të thuhet e vërteta me rrezikun e humbjes, apo të mbahet një sekret që rëndon ndërgjegjen.
(Burimi: THE SUN)
