Në Shtetet e Bashkuara, vigjilja e Ditës së Falënderimeve po shndërrohet në një ditë të veçantë për industrinë e kanabisit, e njohur tashmë si “Green Wednesday” (e mёrkura e gjelbёrt). Shitësit e kanabisit raportojnë se kjo është dita e dytë më e ngarkuar e vitit për shitje, menjëherë pas datës 20 prill, e njohur si “dita e kanabisit”. Tendenca lidhet me traditën amerikane që shumë njerëz, sidomos të rinjtë që rikthehen në qytetet e lindjes për festat, ribashkohen me miq e festojnë së bashku në prag të festës.
Megjithëse nuk është një festë zyrtare, shitësit dhe markat e kanabisit në SHBA po e përdorin termin gjerësisht në fushata marketingu. “Green Wednesday nuk është një festë e vërtetë,” tha Jennifer Bartholomeo, menaxhere e një zinxhiri rrjeti furnizimi në Nju Jork. “Por vriteni pak mendjen: udhëtoni për të parë familjen, miqtë e vjetër takohen sërish dhe dalin për një shëtitje. Çfarë mendoni se ndodh gjatë asaj shëtitjeje?”, shtoi ajo me ironi.
Termi u përhap në mesin e viteve 2010, kur legalizimi i kanabisit filloi të zgjerohej në shumë shtete amerikane. Sot, sipas Joyce Sinali, bashkëthemeluese e Cannabis Media Council, rreth 10–20% e blerësve në këtë ditë janë klientë për herë të parë. Fenomeni po rritet edhe për shkak se një pjesë e njerëzve po zëvendësojnë konsumin e alkoolit me produkte me bazё kanabisin.
Për shumë familje, kjo ditё është bërë pjesë e një rituali social. Disa të rinj e quajnë këtë periudhë kohore si “xhiro me kushёrinjtё” – dalja e fshehtë nga shtëpia për një shëtitje me kushërinj para ose pas darkës së Falënderimeve. “Është një mënyrë për t’u afruar, për të biseduar dhe për të ndarë përvoja,” thotë Will Cohen, bashkëthemelues i markës Tokin’ Jew. Ai kujton se vite më parë kjo ditë njihej si “Blackout Wednesday” (e mёrkura e dehjes me alkool), kur shumë të rinj dilnin për të pirë alkool në mënyrë të tepruar, ndërsa tani dy kulturat po konkurrojnë për vend në traditat e festave.
Sociologët thonë se ky fenomen është pjesë e ndryshimeve kulturore rreth perceptimit të kanabisit dhe rregullimit të tij ligjor në shumë shtete amerikane. Për industrinë e kanabisit, megjithatë, kjo ditё është kthyer në një ditë të rëndësishme ekonomike, e cila vazhdon të fitojë terren çdo vit.
(Pёrshtatur nga CNN)
