Sa herë që gazetari i CNN, Don Riddell, takon Kim McAdams në Roswell të Xhorxhias, ajo është gjithmonë zbathur. McAdams punon në një stacion kontrolli të emetimeve të makinave dhe, që prej katër vitesh, ai nuk e ka parë kurrë me këpucë — as në vapë, as në shi. Praktika e saj për t’i mbajtur këmbët drejtpërdrejt në kontakt me tokën ka ngjallur kureshtje, sidomos pasi në mediat sociale trendi i quajtur grounding ose earthing (qё shqip mund tё pёrkthehet si tokёzim me natyrёn) është bërë viral.
McAdams tregon se prej adoleshencës nuk duronte dot të vishte këpucë, dhe vetëm më vonë kuptoi se kjo mënyrë jetese lidhej me një filozofi shëndeti. “Më bën të ndihem më mirë, më të shëndetshme. Është sikur e ndjej tokën poshtë këmbëve,” thotë ajo. Sot, shumë njerëz i drejtohen kësaj metode për t’u lidhur më shumë me natyrën dhe për të gjetur qetësi, thotë ajo, “sepse ka shumë stres në jetën moderne dhe shumë kimikate në gjithçka ne konsumojmë.”
Kjo ide e shtyu edhe Riddell të provonte vetë. Ai e kishte të brendshme ndjesinë se natyra është një vend shërues, por nuk e kishte menduar se një shëtitje zbathur mund të ndryshonte diçka të prekshme në përditshmërinë e tij.
Para 10 vitesh, gjatë punës së zakonshme në kopsht, ai vendosi të fikte muzikën dhe thjesht të dëgjonte natyrën. Më vonë, filloi të punonte zbathur mbi bar, duke gjetur qetësi në kontaktin e drejtpërdrejtë me tokën. “Ishte një ndjesi e çuditshme por shumë e këndshme,” kujton ai.
I frymëzuar edhe nga dokumentari “The Earthing Movie”, Riddell vendosi të bënte një shëtitje të vërtetë zbathur në një park në Roswell. Fillimi ishte i vështirë — zhavorri, gjethet e thara, rrënjët e pemëve — por pas pak minutash këmbët u mësuan. Kalimtarët e shihnin me habi dhe kureshtje, ndërsa një çift pas tij komentoi: “Ai është duke u lidhur me tokën.”
Rezultati i papritur erdhi atë natë: për një javë rresht ai fjeti pandërprerë, gjë që rrallë i ndodhte. Nuk e di nëse ishte refleksologji natyrale, apo rastësi — por ndryshimi ishte real.
Shkenca për grounding ende është në zhvillim. Disa studiues besojnë se toka mund të ndihmojë trupin duke balancuar ngarkesat elektrike, duke ulur inflamacionin dhe qetësuar sistemin nervor. “Është një teori interesante,” thotë Dr. Melissa Lem nga Universiteti i British Columbia, “por provat shkencore janë ende të kufizuara.” Megjithatë, ajo thekson se mijëra studime tregojnë përfitime të fuqishme shëndetësore duke kaluar thjesht kohë në natyrë.
Eksperimenti i Riddell lidhet edhe me faktin se kontakti i drejtpërdrejtë me mjedisin natyror përmirëson biodiversitetin mikrobial të lëkurës dhe zorrëve, gjë që mund të ndikojë te imuniteti dhe mirëqenia mendore, sipas studiuesit Mat White nga Universiteti i Vjenës.
Në një botë të tejmbushur me teknologji, stres dhe ndarje nga natyra, grounding mund të jetë një mënyrë e thjeshtë për të rikthyer ekuilibrin. Nuk kërkon pajisje të kushtueshme. Mund të bëhet duke ecur zbathur në bar, në rërë, duke notuar në det ose duke prekur tokën me duar gjatë punës në kopsht.
“Nuk mund ta teprosh duke ecur mbi bar,” thotë me humor Josh Tickell, regjisori i dokumentarit. Çfarëdo që dikush të besojë mbi energjitë dhe jonet, një mesazh është i sigurt: dalja në natyrë të bën mirë.
(Pёrshtatur nga CNN)
