Era anti-korrupsion, me sa duket, ka nisur të fryjë edhe në Kosovë.
Agjencia Kundër Korrupsionit ka konfirmuar nisjen e një procedure zyrtare për verifikimin e pasurisë së Presidentes së Republikës së Kosovës, Vjosa Osmani, pas dyshimeve për mospërputhje të theksuara në deklarimet e saj financiare.
Sipas burimeve brenda Agjencia Kundër Korrupsionit, dallimet janë vërejtur gjatë krahasimit të formularëve të deklarimit të pasurisë për vitet 2024 dhe 2025. Këto mospërputhje kanë qenë të mjaftueshme për të aktivizuar mekanizmat ligjorë të verifikimit, ashtu siç e parasheh ligji për zyrtarët e lartë publikë.
Burimet bëjnë të ditur se ndryshimet lidhen kryesisht me rritjen e kursimeve dhe me shtimin e shumës së parave të gatshme të deklaruara nga presidentja. Në dokumentacionin e vitit 2025 janë evidentuar lëvizje financiare të konsiderueshme krahasuar me një vit më parë, çka ka ngritur pikëpyetje për burimin dhe arsyetimin e këtyre ndryshimeve.
Presidentja Osmani, e cila shpesh përmendet në opinionin publik për standardin e saj të jetesës, rezulton se ka blerë një shtëpi në një zonë luksoze në periferi të Prishtinës, ndërkohë që pasuria e saj nuk kufizohet vetëm brenda territorit të Kosovës.
Në deklarimet zyrtare figurojnë edhe prona tё paluajtshme në Australi, ku vetëm një shtëpi vlerësohet me mbi gjysmë milioni euro. Po ashtu, në deklarimin e vitit të kaluar, Osmani ka raportuar se së bashku me bashkëshortin zotërojnë edhe një banesë në Prishtinë, si dhe tokë dhe një shtëpi tjetër në Australi.
Agjencia Kundër Korrupsionit nuk ka dhënë ende detaje mbi kohëzgjatjen e procedurës apo mbi përfundimet e mundshme të verifikimit, por thekson se procesi është teknik, ligjor dhe i njëjtë për çdo zyrtar publik, pa dallim funksioni.
Hetimi i pasurisë së Presidentes vjen në një moment kur debati publik në Kosovë është gjithnjë e më i ndjeshëm ndaj transparencës dhe llogaridhënies së figurave të larta shtetërore. Nëse këto verifikime do të rezultojnë në sqarime bindëse apo në hapa të mëtejshëm ligjorë, mbetet për t’u parë në vijim.
(Burimi: VOX Kosova)
