Princesha e kurorës së Norvegjisë, Mette-Marit, është përfshirë në një polemikë të re pasi dosjet e sapopublikuara të Jeffrey Epstein sugjerojnë se ajo ka pasur vite të tëra kontakti me financierin e ndjerë, i dënuar për krime seksuale ndaj të miturve.
Grupi më i fundit i dokumenteve, i publikuar nga Departamenti amerikan i Drejtësisë, e përmend rreth 1,000 herё princeshën dhe dhjetëra email-e tregojnë se ajo dhe Epstein kanë qenë në komunikim nga viti 2011 deri në 2014, raportoi gazeta norvegjeze VG. Në atë kohë, Epstein ishte deklaruar tashmë fajtor për akuza që përfshinin nxitjen e prostitucionit pas kallёzimit tё një tё miture në Florida.
Zbulimet vijnë në një moment veçanërisht të ndjeshëm për familjen mbretërore norvegjeze, pasi të martën nis gjyqi ndaj djalit të Mette-Marit, Marius Borg Høiby, i cili përballet me 38 akuza, përfshirë përdhunimin e dyshuar të katër grave, sulm seksual dhe vepra të lidhura me drogën. Nëse shpallet fajtor, ai rrezikon deri në 16 vite burg. Høiby ka mohuar akuzat më të rënda.
Vetë princesha, 52 vjeç, reagoi përmes një deklarate duke pranuar gabimin: “Kam treguar gjykim të dobët dhe pendohem thellësisht që kam pasur ndonjë kontakt me Epstein. Është thjesht e turpshme.” Ajo shprehu gjithashtu “simpati dhe solidaritet të thellë” me viktimat e tij.
Email-et e publikuara sugjerojnë një komunikim të afërt mes tyre. Në disa mesazhe, Mette-Marit i shkruante Epsteinit se ai “i guduliste mendjen”, ndërsa në të tjera e përshkruante si “zemërbutë” dhe “të dashur”. Në vitin 2012 ajo e quajti “shumë simpatik”.
Korrespondenca përfshinte edhe biseda për “kërkim për gra” në Paris, ku princesha u përgjigj se kryeqyteti francez ishte “i mirë për kurorëshkelje” dhe shtoi se “skandinavët janë një material më i mirë për gra”. Në një tjetër mesazh, ajo e falënderonte për lulet e dërguara gjatë një periudhe kur nuk ndihej mirë, duke e mbyllur komunikimin me fjalёt “Me dashuri, znj.”.
Dokumentet tregojnë gjithashtu plane të shpeshta për t’u takuar dhe faktin që princesha ka qëndruar për katër ditë në shtëpinë e Epsteinit në Palm Beach, Florida, në vitin 2013, edhe pse ai nuk ndodhej aty.
Megjithatë, përfshirja në dosje nuk nënkupton domosdoshmërisht shkelje ligjore. Në deklaratën e saj, Mette-Marit pranoi se ishte përgjegjëse “për mos verifikimin e të dhënave të Epstein dhe për moskuptimin në kohë të llojit të personit që ishte ai”. Dosjet përmbajnë edhe një email të vitit 2011 ku ajo i shkruante se e kishte “kërkuar në Google” dhe se “nuk dukej shumë mirë”, pa specifikuar se çfarë kishte gjetur.
Sipas pallatit mbretëror, princesha i dha fund komunikimit me shkrim në vitin 2014, pasi besonte se Epstein po përpiqej të përdorte marrëdhënien me të për të ndikuar tek persona të tjerë.
Ndërkohë që gjyqi shtatëjavor i djalit të saj pritet të zhvillohet në Oslo, çifti i kurorës nuk do të marrë pjesë. Princi Haakon ka bërë të ditur se Mette-Marit do të jetë në një udhëtim privat gjatë asaj periudhe. Høiby nuk mban titull mbretëror dhe nuk është në vijën e trashëgimisë.
Më herët, oborri mbretëror ka deklaruar se çështja i takon gjykatave dhe se nuk do të japin komente të mëtejshme.
