Ministri i Shtetit për Evropën në Ministrinë e Jashtme Federale të Gjermanisë, Gunther Krichbaum, zhvilloi sot një vizitë intensive politike në Tiranë, në një moment kur procesi i integrimit evropian dhe debati për shtetin e së drejtës janë sërish në qendër të vëmendjes.
Krichbaum u takua me Kryeministrin Edi Rama, ministren për Administratën Publike dhe Antikorrupsionin Adea Pirdeni, zv.ministren e Jashtme Megi Fino, drejtues të mazhorancës dhe opozitës në Këshillin Kombëtar për Integrimin Evropian, si edhe me kreun e grupit parlamentar të PD-së Gazment Bardhi.
Në axhendë ishte edhe një takim me drejtuesin e SPAK, Klodian Braho – një sinjal i qartë se drejtësia e re mbetet pika më e ndjeshme e dialogut mes Shqipërisë dhe partnerëve evropianë.
Mesazhi publik i diplomatit gjerman ishte i balancuar, por i drejtpërdrejtë: Shqipëria ka bërë përpjekje dhe ka potencial, por rruga drejt BE-së kërkon vijim të vendosur të reformave, forcim të shtetit të së drejtës dhe luftë të pandërprerë kundër korrupsionit dhe krimit të organizuar.
“Ne duam ta shohim Shqipërinë në BE. Jemi mik, mbështetës, por edhe kritik”, deklaroi Krichbaum, duke theksuar se ishte e rëndësishme të dëgjonte jo vetëm qeverinë, por edhe parlamentin dhe drejtësinë – një formulë diplomatike që në Tiranë lexohet gjithmonë edhe si matje e pulsit politik mes palëve.
Takimet prodhuan pamje të zakonshme protokollare: qeveria që paraqet progresin, opozita që paraqet shqetësimet, drejtësia që kërkon pavarësi. Por në thelb, mesazhi i Berlinit mbetet i pandryshuar: integrimi nuk është dhuratë politike, por proces i lidhur drejtpërdrejt me standardet e shtetit të së drejtës.
Në fund, Krichbaum zgjodhi një gjuhë optimiste, por me kusht: Shqipëria ndodhet në “moment vendimtar” dhe rruga drejt BE-së duhet të çohet përpara me vendosmëri dhe bashkëpunim institucional.Gjermani foli siç flet gjithmonë diplomacia e Berlinit: pa zhurmë, pa tone dramatike, por me fjali që peshojnë më shumë se deklaratat e përditshme politike në Tiranë.
Dhe mesa duket, ai ka ditur të shohë edhe një të vërtetë tipike shqiptare: të gjithë janë pro Evropës, por rruga drejt saj mbetet ende një betejë e brendshme.
