Një restaurim i pazakontë në një kishë historike të Romës ka shkaktuar debat të madh publik, pasi një engjëll i pikturuar duket se i ngjan kryeministres italiane, Giorgia Meloni. Ministria italiane e Kulturës dhe dioqeza e Romës kanë nisur hetime për të sqaruar se çfarë ka ndodhur me veprën.
Ngjashmëria u vu re fillimisht nga gazeta La Repubblica, e cila shkroi se një nga dy engjëjt pranë bustit prej mermeri të mbretit të fundit të Italisë në Bazilikën e Shën Lorencit në Lucina tani ka “një fytyrë të njohur dhe çuditërisht bashkëkohore”. “Para restaurimit ishte një kerubin i zakonshëm; sot duket si fytyra e gruas më të fuqishme në vend”, theksonte artikulli.
Polemikat u përhapën shpejt në rrjetet sociale, ndërsa vetë Meloni reagoi me humor. Ajo publikoi një foto të engjëllit në Instagram duke shkruar: “Jo, unë definitivisht nuk dukem si engjëll”, shoqëruar me një emoji që qesh.
Ministria e Kulturës konfirmoi se ka dërguar teknikë për të inspektuar figurën dhe për të “përcaktuar natyrën e punës së kryer”, si edhe për të vendosur mbi hapat e mëtejshëm.
Famullitari i bazilikës, Daniele Micheletti, pranoi se ekziston “njëfarë ngjashmërie”, por shtoi se restaurimi ishte kërkuar vetëm për ta rikthyer kapelën në gjendjen e mëparshme pas dëmtimeve nga uji. Ai theksoi se piktura origjinale daton nga viti 2000 dhe nuk gëzon status të veçantë mbrojtjeje të trashëgimisë kulturore, ndërsa mbrojti restauruesin duke e cilësuar “shumë të aftë”.
Reagime të forta erdhën edhe nga opozita. Irene Manzi nga Partia Demokratike e quajti situatën “të papranueshme” dhe kërkoi hetim për të verifikuar nëse janë shkelur rregulloret e trashëgimisë. Ndërsa Lëvizja Pesë Yje paralajmëroi se arti nuk duhet të shndërrohet në mjet propagande, pavarësisht kujt mund t’i ngjajë figura.
Edhe dioqeza e Romës shprehu “zhgënjim” dhe njoftoi se do të nisë menjëherë hetimet për të përcaktuar përgjegjësitë, duke theksuar se imazhet e artit të shenjtë nuk duhet të keqpërdoren.
Në qendër të debatit është restauruesi 80-vjeçar Bruno Valentinetti, i cili tha se thjesht riktheu pikturën në formën e saj origjinale. “Shumë elementë ishin zhdukur. Hoqa shtresat dhe rishfaqa dizajnin fillestar, pastaj vendosa ngjyrën”, shpjegoi ai, duke shtuar se punën e kishte kryer me bekimin e priftit.
Valentinetti mohoi çdo lidhje politike dhe hodhi poshtë idenë se engjëlli i ngjan kryeministres. “Nuk është Meloni. I riktheva fytyrat ashtu siç ishin 25 vjet më parë,” u shpreh ai. Megjithatë, ai pranoi se polemika ka pasur edhe një efekt pozitiv: “Nuk kemi parë kurrë kaq shumë njerëz në këtë kishë vitet e fundit.”
