Autoriteti amerikan i Ushqimit dhe Barnave (FDA) ka miratuar një version në formë pilule të ilaçit për dobësim Wegovy, duke u ofruar pacientëve një alternativë ndaj injeksioneve, veçanërisht për ata që kanë frikë nga gjilpërat ose ndihen të parehatshëm me to.
Pilula, e quajtur thjesht Wegovy pill, pritet të jetë e disponueshme në Shtetet e Bashkuara në fillim të vitit të ardhshëm. Sipas të dhënave nga një studim klinik i sponsorizuar nga kompania prodhuese Novo Nordisk, ajo është pothuajse po aq efektive sa versioni injektues.
Pilula përmban një dozë më të lartë të semaglutidit – përbërësi aktiv i Wegovy dhe i ilaçit për diabetin Ozempic – sepse vetëm një pjesë e vogël e substancës përthithet nga organizmi kur merret nga goja.
Në një provë klinike, personat që morën pilulën Wegovy humbën mesatarisht 13.6% të peshës trupore pas 71 javësh, ndërsa grupi placebo humbi rreth 2%. Për krahasim, përdoruesit e injeksionit Wegovy humbasin rreth 15% të peshës në një periudhë të ngjashme.
Megjithatë, ekspertët paralajmërojnë se rezultatet e studimeve nuk përkthehen gjithmonë njësoj në jetën reale. “Efektiviteti i vërtetë do të varet nga përvoja konkrete e pacientëve,” tha Dr. David Kessler, ish-komisioner i FDA-së.
Në një marrëveshje me administratën Trump, Novo Nordisk njoftoi se doza më e ulët e pilulës Wegovy do të kushtojë 149 dollarë në muaj, ndërsa çmimet për dozat e tjera nuk janë bërë ende publike. Dozat fillestare zakonisht shërbejnë për përshtatjen e trupit dhe nuk sjellin humbje të madhe peshe.
Mjekët thonë se shumë pacientë mund të preferojnë pilulën ndaj injeksioneve, për shkak të lehtësisë në përdorim dhe transport. Por ka edhe skepticizëm praktik: pilula duhet të merret me stomak bosh, herët në mëngjes, dhe pa konsumuar ushqim apo pije për 30 minuta, çka për disa persona është e vështirë për t’u zbatuar.
Si pilula ashtu edhe injeksioni Wegovy janë të miratuara edhe për uljen e rrezikut të sёmundjeve kardiovaskulare. Megjithatë, ekspertët theksojnë se këto barna nuk janë zgjidhje magjike.
Në studim, rreth 74% e përdoruesve të pilulës përjetuan efekte anësore gastrointestinale, krahasuar me 42% në grupin placebo – një përqindje e ngjashme me atë të injeksionit.
Ky zhvillim shënon një hap të madh në trajtimin e obezitetit, por ekspertët bien dakord për një gjë: ilaçet për dobësim janë ndihmë, jo zëvendësim i një stili të shëndetshëm jetese. Ushqimi i balancuar, aktiviteti fizik dhe ndjekja mjekësore mbeten thelbësore, pavarësisht formës së ilaçit.
(Burimi: The New York Times)
