Nga kontrasT.al
Në 2025-ёn administrata e shtetit dhe Banka e Shqipërisë “gëzoi” ditë pushimi me vendim qeverie, përveç atyre ditëve që përcaktohen si Kalendar i Festave Zyrtare në Shqipëri, e që s’janë pak. Këto ditë bashkë me ditët kur festat zyrtare përkonin me të shtunën ose të dielën, e për pasojë pushimi shtyhet në ditët pasardhëse të punës, e bëjnë Shqipërinë dhe administratën e saj, vendin më të paguar në botë për ditë pushimi.
Të gjitha ditët e festave zyrtare kanë emra të veçantë sipas përkatësisë së tyre. Dita e Verës, Dita e Nevruzit, Dita e Shenjtërimit të Nënë Terezës, Dita e Alfabetit, Flamurit, Çlirimit apo Dita Kombëtare e Rinisë.
Ditë si e sotmja apo ditë si ato të 15, 16 majit kur qeveria ka marrë vendim për pushim, nuk kanë emër. Si do emërtohen?
Zhvillimi në Tiranë, më 15 dhe 16 maj 2025 i Samitit të Komunitetit Politik Evropian, e “dërgoi” administratën e kryeqytetit në shtëpi, pushim. Me vendim qeverie, të zëvendëskryeministres Balluku, datat 15 dhe 16 maj u shpallën ditë pushimi për punonjësit e institucioneve të administratës shtetërore, me seli në territoret e bashkive Tiranë, Kamzë, Vorë dhe Krujë. Por kjo datë sipas VKM-së do të zëvendësohej në ditët e pushimit brenda vitit 2025.
15, 16 maji jo vetëm nuk u zëvendësua, por erdhi 25 dhjetori, Festë Zyrtare si Dita e Krishtlindjes dhe 26 dhjetori pushim me vendim qeverie, po ashtu.
“Dita e Belёs“
Vendimi për shpalljen e ditës së sotme si pushim zyrtar u përfol gjerësisht. U komentua nga administrata, u shpërnda në rrjete sociale dhe u prit me entuziazëm nga ata që nuk do shkonin në punë.
Pak kush vuri re një detaj të vogël në dokumentet zyrtare.
Në faqen e Kryeministrisë, Vendimi i Këshillit të Ministrave për 26 dhjetorin 2025 figuron sikur e ka firmosur kryeministri Edi Rama. Në Fletoren Zyrtare, po i njëjti vendim mban emrin e Belinda Ballukut, në cilësinë e zëvendëskryeministres.
Ky do të ishte thjesht një detaj administrativ, herë të tjera, për VKM të tjera jashtë kontekstit të situatës aktuale Qeveri-SPAK, por dhe të vetë statusit të zëvendëskryeministres Balluku, brenda këtij raporti luftarak. Sepse Belinda Balluku është nën hetim. Ndaj saj u vendos pezullim “firme” nga GJKKO, më pas, me vendim të Gjykatës Kushtetuese, e drejta për të firmosur “ditë pushimi” iu rikthye.
Rikthimi ishte i shpejtë, aq sa firmat u rishfaqën para se të shuhej zhurma. SPAK-u ka frikë se mos prishen provat. Administrata, falë vendimit, nuk shkon fare në zyrë.
Kundërpërgjigja “Balluku” është e fortë: kur drejtësia kërkon kujdes që të mos preket asgjë, ajo kujdeset që dyert të jenë të mbyllura.
Ndërkohë, në Kuvend, ende nuk është mbledhur Këshilli për Mandatet për të shqyrtuar heqjen e imunitetit të zëvendëskryeministres në detyrë. Edhe aty koha ecën ngadalë. Me ritmin e urimeve. Krishtlindjes. Dhuratave. Dita e pushimit ndihmon shumë.
Kjo ditë u pranua nga të gjithë me gëzim, teksa u zyrtarizua, në njërën faqe, nga Kryeministri, në tjetrën, nga zëvendëskryeministrja e rikthyer për të na dhënë një të premte pushim tepër.
Juridikisht, gjithçka duket në rregull. Politikisht, gjithçka është si zakonisht. Qeveria ruan SPAK-un. SPAK-u ruan provat. Administrata ruan pushimin. Populli paguan çmimin..!
Në kohën që paguan, kupton se sot pushimin e kanë prej zëvendëskryeministres së tyre, Belinda Ballukut.
Ndaj, dita e sotme, do futet në Kalendarin e Festave Zyrtare, si 26 dhjetori – “Dita e Belёs”.
© Ky është shkrim ekskluziv i kontrasT.al, i cili gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar burimin e tij.
