Autoritetet finlandeze kanë ndaluar një anije tregtare dhe të gjithë ekuipazhin e saj, pasi një kabllo kritike nënujore e telekomunikacionit, që lidh Finlandën me Estoninëm u dëmtua të mërkurën. Lajmi u konfirmua nga policia finlandeze, e cila po heton incidentin si një rast serioz penal.
Sipas autoriteteve, anija e dyshuar u gjet në ujërat territoriale të Finlandës me zinxhirin e spirancës të ulur në det, ndërsa vendi ku është dëmtuar kablloja ndodhet në ujërat e Estonisë. Më vonë, policia identifikoi mjetin lundrues si Fitburg, një anije mallrash me flamur të Shën Vincentit dhe Grenadineve.
Komisioneri Kombëtar i Policisë së Finlandës, Ilkka Koskimäki, deklaroi në një konferencë për shtyp në Helsinki se të 14 anëtarët e ekuipazhit janë ndaluar. Sipas tij, ekuipazhi përbëhet nga shtetas të Rusisë, Gjeorgjisë, Kazakistanit dhe Azerbajxhanit.
Të dhënat nga platforma e ndjekjes së anijeve MarineTraffic tregojnë se Fitburg ishte nisur të martën nga porti rus i Shën Petersburgut dhe kishte si destinacion qytetin Haifa në Izrael.
Pas raportimit të dëmtimit, autoritetet finlandeze urdhëruan anijen të ndalonte dhe të ngrinte spirancën, përpara se të merrnin kontrollin e saj. Mediat finlandeze raportuan se operacioni u krye nga forca speciale të policisë dhe roja bregdetare, të cilat zbarkuan nga helikopterët.
Presidenti i Finlandës, Alexander Stubb, deklaroi se qeveria po e monitoron situatën nga afër dhe se vendi është “i përgatitur për sfida të ndryshme sigurie”.
Policia ka nisur hetime për dëmtim të rëndë kriminal, tentativë për dëmtim të rëndë kriminal dhe ndërhyrje të rëndë në telekomunikacion. Kablloja e dëmtuar lidh kryeqytetin finlandez Helsinki me kryeqytetin estonez Talin dhe operohet nga kompania finlandeze Elisa, e cila konfirmoi se janë konstatuar defekte serioze në lidhje.
Kryeministri i Finlandës, Petteri Orpo, bëri të ditur se ka folur me homologun e tij estonez, Kristen Michal, duke theksuar se dy vendet po bashkëpunojnë ngushtë për menaxhimin e situatës. Nga ana tjetër, Ministria estoneze e Drejtësisë dhe Çështjeve Digjitale siguroi se shërbimet nuk janë ndërprerë, pasi lidhjet janë të mbështetura nga kabllo të tjera tokësore dhe detare. Megjithatë, autoritetet estoneze konfirmuan se edhe një kabllo e dytë, në pronësi të kompanisë suedeze Arelion, është dëmtuar.
Një model shqetësues incidentesh në Detin Baltik
Ky nuk është një rast i izoluar. Që nga viti 2023, të paktën 10 kabllo nënujore janë prerë ose dëmtuar në Detin Baltik. Zyrtarë nga vendet nordike, shtetet baltike dhe Bashkimi Evropian kanë ngritur dyshime se këto incidente mund të jenë pjesë e asaj që ekspertët e quajnë luftë hibride e Kremlinit kundër Perëndimit.
Edhe pse Rusia i ka mohuar vazhdimisht këto akuza, disa nga anijet e përfshira në incidente të mëparshme kanë pasur lidhje me Rusinë. Vitin e kaluar, një kabllo energjie dhe disa kabllo të dhënash u dëmtuan pasi një anije me flamur të Ishujve Cook tërhoqi spirancën për më shumë se 80 kilometra në shtratin e detit. Autoritetet finlandeze dhe evropiane thanë se ajo anije ishte pjesë e të ashtuquajturës “flotë hije” të cisternave ruse.
Këto zhvillime kanë shtyrë NATO-n të nisë projekte të posaçme për forcimin e mbrojtjes së infrastrukturës kritike nënujore, në një rajon që po shndërrohet gjithnjë e më shumë në një pikë tensioni strategjik.
(Burimi: CNN)
