Tensionet diplomatike mes Parisit dhe Uashingtonit janë thelluar pasi Franca vendosi të kufizojë aksesin e ambasadorit amerikan Charles Kushner në nivelet më të larta të qeverisë, ndërsa ai nuk iu përgjigj një thirrjeje zyrtare të Ministrisë së Jashtme.
Sipas autoriteteve franceze, ambasadori nuk u paraqit në takim për të diskutuar komentet e administratës së presidentit amerikan Donald Trump lidhur me vrasjen e një aktivisti të ekstremit të djathtë në Lion. Si pasojë, ministri i Jashtëm francez Jean-Noël Barrot kërkoi që Kushner të mos ketë më akses të drejtpërdrejtë tek ministrat e qeverisë franceze.
Megjithatë, Parisi nuk ka ndërmarrë masa ekstreme diplomatike: ambasadorit do t’i lejohet të vazhdojë detyrat e tij formale dhe të zhvillojë kontakte të caktuara me zyrtarë, ndërsa dera për dialog mbetet e hapur. Ministria e Jashtme theksoi se është ende e mundur që ai të paraqitet në Quai d’Orsay për të “zbutur irritimet” që mund të lindin mes dy vendeve me një histori marrëdhëniesh 250-vjeçare.
Kriza diplomatike shpërtheu pas komenteve të zyrtarëve amerikanë për vdekjen e 23-vjeçarit Quentin Deranque, i cili humbi jetën pas përleshjeve mes grupeve të ekstremit të djathtë dhe të majtë gjatë një proteste në Lion. Administrata amerikane dënoi atë që e quajti “radikalizëm i dhunshëm i së majtës”, duke e konsideruar rastin si shembull të terrorizmit politik.
Deklaratat u kundërshtuan ashpër nga Parisi, i cili i cilësoi si përpjekje për të instrumentalizuar një tragjedi që i përket debatit të brendshëm francez. Barrot theksoi se Franca “nuk ka nevojë për leksione” mbi çështjen e dhunës politike dhe paralajmëroi se ambasadori do të thirrej për sqarime – takim që nuk u zhvillua për shkak të mungesës së Kushner, i cili dërgoi një zyrtar të lartë të ambasadës në vend të tij.
Ngjarja ka ndezur debat të fortë politik në Francë, ndërsa presidenti Emmanuel Macron pritet të zhvillojë një mbledhje të posaçme për grupet e dhunshme politike. Ndërkohë, autoritetet franceze kanë nisur hetime edhe për raportime mbi përdorimin e simboleve neo-naziste gjatë një tubimi në mbështetje të viktimës.
Vendimi për kufizimin e aksesit të ambasadorit amerikan shihet si një sinjal i qartë diplomatik: Parisi nuk do të tolerojë ndërhyrje në debatet e tij të brendshme, por njëkohësisht kërkon të shmangë një përshkallëzim të hapur me aleatin e tij historik.
(Burimi: France 24, AP)
