Banorët e fshatit Jabo, në veriperëndim të Nigerisë, po përballen me frikë dhe konfuzion pasi një pjesë rakete, e lidhur me operacionin ajror amerikan, ra pranë komunitetit të tyre, vetëm pak metra larg qendrës së vetme shëndetësore lokale. Ngjarja ka ngritur pikëpyetje të forta mes vendasve, të cilët mohojnë çdo prani apo aktivitet të grupit terrorist Shteti Islamik në zonë.
Sipas dëshmive për CNN, shpërthimi ndodhi rreth orës 22:00 të së enjtes, duke tronditur fshatin bujqësor të qetë në distriktin Tambuwal të shtetit Sokoto. Suleiman Kagara, një nga banorët, tha se dëgjoi një shpërthim të fortë dhe pa flakë në qiell, përpara se predha të binte në tokë. “Nuk kemi parë kurrë diçka të tillë. Askush nuk mundi të flinte nga frika”, tha ai.
Vetëm pak orë më vonë, presidenti amerikan Donald Trump deklaroi se Shtetet e Bashkuara kishin kryer një “sulm të fuqishëm dhe vdekjeprurës” kundër militantëve të Shteti Islamik në Nigeri, duke i akuzuar ata për sulme të rënda ndaj civilëve, veçanërisht të krishterëve. Komanda Amerikane për Afrikën njoftoi se operacioni kishte neutralizuar disa militantë.
Megjithatë, ky shpjegim ka habitur banorët e Jabos. Edhe pse disa pjesë të shtetit Sokoto përballen me banditizëm dhe dhunë nga grupe të armatosura, vendasit këmbëngulin se fshati i tyre nuk ka histori terrorizmi dhe se myslimanët dhe të krishterët bashkëjetojnë në harmoni. “Ne i shohim të krishterët si vëllezër. Nuk kemi konflikte fetare këtu”, tha Kagara.
Edhe Bashar Isah Jabo, ligjvënës që përfaqëson Tambuwal në parlamentin shtetëror, e përshkroi Jabon si “një komunitet paqësor” pa prani të njohur të ISIS-it apo grupeve të ngjashme. Ai konfirmoi se predha kishte rënë rreth 500 metra larg qendrës shëndetësore, pa shkaktuar viktima, por duke përhapur panik mes banorëve.
Nga ana e saj, Ministria e Informacionit e Nigerisë sqaroi se, në bashkëpunim me SHBA-në, ishin kryer “sulme precize” kundër objektivave të ISIS-it në pyjet e distriktit Tangaza, ndërsa pranoi se mbetje municionesh kishin rënë aksidentalisht në Jabo dhe në një zonë tjetër të vendit. Autoritetet theksuan se nuk kishte viktima civile.
Ministri i Jashtëm nigerian, Yusuf Tuggar, tha se operacioni ishte miratuar nga presidenti Bola Tinubu dhe se qëllimi nuk kishte lidhje me fenë, por me mbrojtjen e civilëve. Ai theksoi se sfidat e sigurisë në Nigeri janë komplekse dhe nuk mund të reduktohen vetëm në faktorë fetarë.
Analistët vërejnë se, edhe pse sulmet ajrore mund të dobësojnë disa grupe të armatosura, ato nuk adresojnë shkaqet rrënjësore të dhunës në Nigeri, si dështimet e qeverisjes, rivalitetet etnike dhe konfliktet për burime. “Pa zgjidhje strukturore, dhuna ka gjasa të vazhdojë”, paralajmërojnë ekspertët.
(Burimi: CNN)
