Një status surprizë nga Edi Rama të bën të kuptosh se ai – pra Shqipëria – do të rreshtohet në krah të vendeve që do të “rindërtojnë” dhe do të udhëheqin përkohësisht Gazën, një territor i rrënuar nga lufta dhe tragjedia njerëzore.
Në faqen zyrtare të Shtëpisë së Bardhë janë publikuar emrat e Bordit të Paqes për Gazën, një strukturë e re ndërkombëtare e ideuar nga Presidenti Donald Trump për administrimin e përkohshëm dhe rindërtimin e territorit pas luftës.
Në këtë bord bëjnë pjesë figura të rëndësishme politike dhe ekonomike botërore: Marco Rubio, Steve Witkoff, Jared Kushner, Sir Tony Blair, Marc Rowan, Ajay Banga, Robert Gabriel.
Në fund të njoftimit zyrtar të Shtëpisë së Bardhë thuhet: “Anëtarë të tjerë të Bordit Ekzekutiv dhe të Bordit Ekzekutiv për Gazën do të shpallen në javët në vijim…”.
Rama, përmes statusit të tij, nënkupton se ka marrë një ftesë për të qenë pjesë e këtyre bordeve, por ende nuk ka publikuar dokumentin e ftesës. Ai ka shpallur vetëm pranimin, me një ton të fortë krenarie, për të qenë pjesë e këtij autoriteti ndërkombëtar që do të merret me udhëheqjen e përkohshme të Gazës.
Natyrisht, Rama do ta përdorë këtë ftesë si një kartë politike prestigji në arenën ndërkombëtare. Por ende nuk është e qartë se çfarë roli konkret do të ketë Shqipëria dhe në krah të kujt do të rreshtohet në procesin delikat të pasluftës në Gaza.
Por mbi të gjitha, a do ta pranojë populli palestinez këtë “qeveri” të përkohshme të vendosur nga jashtë?
Dhe a do të jetë Shqipëria në krah të atyre që kërkojnë të administrojnë Gazën si projekt gjeopolitik, apo në krah të një populli të shkatërruar që kërkon drejtësi dhe dinjitet?
A do të jemi me ata që duan të “menaxhojnë” Palestinën, apo me popullin e shkretë?
Nëse kjo strukturë shihet nga palestinezët si një instrument i imponuar nga Trump dhe Izraeli, atëherë çdo figurë që bëhet pjesë e saj rrezikon të shihet si bashkëpunëtore e një projekti të huaj ndaj vullnetit të popullit vendas.
Mbetet për t’u parë…
