Aktori i njohur amerikan George Clooney po kalon një moment të dhimbshëm familjar, pasi motra e tij e dashur, Ada Zeidler, është ndarë nga jeta në moshën 65-vjeçare, pas një beteje të gjatë me kancerin.
Në një deklaratë prekëse, Clooney e përshkroi motrën si “heroinёn” e tij:
“Motra ime, Ada, ishte heroina ime. Ajo u përball me kancerin me guxim dhe humor. Nuk kam takuar kurrë askënd kaq të fortë. Mua dhe Amalit do të na mungojë shumë.”
Sipas një nekrologjie zyrtare, Ada Zeidler ndërroi jetë më 19 dhjetor në Qendrën Shëndetësore St. Elizabeth, në Kentucky, e rrethuar nga njerëzit që i donte dhe “në paqe”.
E lindur më 2 maj 1960 në Los Angeles nga prindërit Nina dhe Nick Clooney, Ada përshkruhet si një artiste e talentuar dhe edukatore e përkushtuar. Ajo shërbeu për disa vite si mësuese arti në Shkollën e Pavarur Augusta dhe u dallua që në moshë të re për arritjet e saj akademike, duke u kualifikuar si Studiuese e Meritës Kombëtare në shkollën e mesme.
Dashuria e saj për librat e çoi të ishte pjesë aktive e një klubi lokal leximi, ndërsa pasioni për artin e bëri anëtare të Augusta Art Guild. Ajo kishte edhe një rol të veçantë në komunitet.
Ada Zeidler lë pas bashkëshortin e saj Kenny, fëmijët Nick Zeidler dhe Allison Zeidler Herolaga, vëllain e saj George Clooney dhe bashkëshorten e tij Amal, si edhe një rreth të gjerë familjarësh.
Ceremonia mortore pritet të mbahet të hënën, më 22 dhjetor, në Kishën Katolike të Shën Patrikut në Maysville, Kentucky.
Edhe pse zgjodhi të jetonte larg vëmendjes publike, Ada ishte gjithmonë pranë vëllait të saj të famshëm. Ajo u pa publikisht në vitin 2014 në dasmën e George Clooney-t me Amal në Venecia, ku momentet e tyre familjare të afërta tërhoqën vëmendjen e mediave.
George dhe Ada u rritën në Kentucky dhe kishin një lidhje shumë të ngushtë. Aktori ka folur shpesh për rëndësinë e familjes dhe vlerave me të cilat u rrit, duke theksuar se jeta në një komunitet të vogël i mësoi njerëzit të respektojnë dhe mbështesin njëri-tjetrin.
“Jam shumë i afërt me motrën time,” kishte thënë ai më herët, duke e quajtur familjen një nga shtyllat më të forta të jetës së tij.
(Burimi: Daily Mail)
