Belina Pupa është liruar nga të gjitha akuzat pas një vendimi të marrë nga Gjykata në Australi, lidhur me çështjen e kultivimit të substancave narkotike në një pronë të regjistruar në emrin e saj. Pas disa muajsh proces gjyqësor, burime të “VipMagazine” kanë konfirmuar se gjyqi ka përfunduar në favor të saj, duke e shpallur të pafajshme.
Ka reaguar edhe bashkëshorti i saj, aktori i njohur i humorit Elvis Pupa, i cili ka ndarë lajmin në rrjetet sociale. Në një postim në Instagram, ai shkruan: “Faleminderit të gjithëve për mbështetjen. Uroj që të mos ju ndodhin situata të tilla, që të kemi mundësi t’jua shpërblejmë.”
Ngjarja daton më 23 maj të këtij viti, kur Belina Pupa u paraqit përpara gjykatës në Australi, pasi autoritetet dyshonin për përfshirjen e saj në aktivitet të paligjshëm të kultivimit të drogës dhe përdorimit të jashtëligjshëm të energjisë elektrike në një banesë që figuron në emrin e saj.
Në një intervistë për “Dritare TV”, Belina sqaroi se prona në fjalë ishte dhënë me qira dhe ajo nuk kishte dijeni për veprimtarinë që zhvillohej aty.
Ndërkohë, në media u përfol se edhe aktori Elvis Pupa mund të ishte i përfshirë në të njëjtën çështje dhe madje u tha se ai ishte shpallur në kërkim nga autoritetet australiane. Megjithatë, vetë aktori e mohoi kategorikisht këtë informacion, duke e cilësuar si të pavërtetë dhe duke dënuar keqinformimin rreth rastit.
