Një gjykatëse federale ka bllokuar përkohësisht vendimin e administratës Trump për t’i dhënë fund Statusit të Mbrojtjes së Përkohshme (TPS) për rreth 350 mijë shtetas nga Haiti, duke u lejuar atyre të vazhdojnë të jetojnë dhe punojnë ligjërisht në Shtetet e Bashkuara.
Gjyqtarja Ana Reyes lëshoi një urdhër pezullimi që ndalon Sekretaren e Sigurisë Kombëtare, Kristi Noem, të zbatojë vendimin për heqjen e programit, i cili pritej të skadonte këtë javë. Në vendimin e saj, Reyes theksoi se paditësit kanë gjasa të fitojnë çështjen dhe sugjeroi se ndërprerja mund të jetë ndikuar nga “armiqësia ndaj emigrantëve jo të bardhë”.
Ajo vuri në dukje gjithashtu gjuhën e përdorur nga Noem kur njoftoi vendimin, duke përmendur se haitianët që kërkonin strehim ishin cilësuar si “vrasës, shushunja ose të varur nga ndihma”. Paditësit, theksoi gjykatësja, “nuk janë asgjë nga këto”.
Sipas urdhrit dyfaqësh, ndërprerja e TPS-së është “e pavlefshme dhe pa efekt ligjor” gjatë periudhës së pezullimit, çka do të thotë se për momentin përfituesit nuk rrezikojnë deportimin dhe mund të vazhdojnë të punojnë.
Statusi i Mbrojtjes sё Përkohshme u jepet shtetasve të vendeve që konsiderohen të pasigurta për t’u rikthyer për shkak të fatkeqësive natyrore, konflikteve apo paqëndrueshmërisë politike, por nuk krijon rrugë drejt shtetësisë. Për Haitin, programi u aktivizua pas tërmetit shkatërrues të vitit 2010 dhe është zgjatur disa herë, ndërsa vendi vijon të përballet me dhunë bandash dhe zhvendosje masive të popullsisë.
Administrata Trump ka ndjekur një linjë të ashpër për heqjen e këtyre mbrojtjeve si pjesë e një strategjie më të gjerë deportimesh masive. Përveç haitianëve, janë prekur edhe qindra mijëra emigrantë nga Venezuela, Hondurasi, Nikaragua, Nepali, si dhe dhjetëra mijëra ukrainas, afganë dhe kamerunas — disa prej të cilëve kanë ngritur padi në gjykatat federale.
Avokatët e paditësve paralajmëruan se kthimi i detyruar në Haiti mund të ketë pasoja tragjike. “Nëse vendimi hyn në fuqi, njerëzit pothuajse me siguri do të vdesin — disa nga dhuna, të tjerë nga sëmundjet apo uria,” thuhet në dosjen gjyqësore.
Vendimi i gjykatës përbën një pengesë të rëndësishme për politikën e imigracionit të administratës dhe, të paktën për momentin, u jep frymëmarrje mijëra familjeve që rrezikonin dëbimin.
(Burimi: Associated Press/The Guardian)
