Nominimet e Golden Globe pritet të dominohen këtë vit nga filma dhe seriale që pasqyrojnë më shumë se kurrë epokën e ankthit, frikës dhe pasigurive që po kalon shoqëria moderne. Akademia e çmimeve duket se është gati t’i vërë në qendër të vëmendjes historitë që flasin drejtpërdrejt pёr shqetësimet e kohës sonë.
Në krye të diskutimeve renditet “One Battle After Another”, një dramë politike e tensionuar që konsiderohet si një nga pretendentët më të fortë të sezonit. Leonardo DiCaprio jep një interpretim të guximshëm dhe të rrallë, si një revolucionar i pafat i zhytur në intriga të errëta politike dhe i rrethuar nga figura femërore të fuqishme, të rrezikshme dhe thellësisht intriguese. Filmi pritet të grumbullojë nominime në thuajse të gjitha kategoritë e mëdha – aktrim, regji dhe skenar.
Një tjetër konkurrues i fuqishëm është “Sentimental Value” i Joachim Trier, një dramë e brishtë familjare që eksploron ankthin, panikun dhe marrëdhëniet e komplikuara midis një aktoreje të ndjeshme dhe babait të saj të ftohtë emocionalisht. Renate Reinsve ka bёrё një interpretim të jashtëzakonshëm, ndërsa Elle Fanning shfaqet në një rol të fuqishëm që sfidon kufijtë e saj artistikë. Performanca e Stellan Skarsgård shton edhe më shumë intensitet në ekran.
Edhe pse duket sikur ka kaluar kohë, suksesi i “Sinners”, trilleri i Ryan Coogler që përzien tmerret njerëzore me ato mbinatyrore në kontekstin e segregimit Jim Crow, vazhdon të rezonojë fort. Filmi ka qenë një hit i madh në kinema, sidomos tek audienca me ngjyrë, dhe pritet të ketë një prani të ndjeshme në nominime.
Në garë pritet të shfaqen edhe superproduksione si “Hamnet” dhe muzikali gjigant “Wicked: For Good”. Ndërkohë, publiku i gjeneratës së re vazhdon të kërkojë njohje për “KPop Demon Hunters”, hitin që është shndërruar në kolonë zanore të jetës së tyre.
Një nga figurat më ikonike të këtij sezoni është pa dyshim pamja e frikshme në filmin “Weapons”, që tashmë është kthyer në simbol të ankthit bashkëkohor. Kritika e ka cilësuar portretizimin e imazhit tё frikshёm nё film si mishërim të frikës sociale të vitit.
Edhe televizioni është i mbushur me histori që flasin për ankth dhe frikë kolektive. “Severance”, një homazh i errët ndaj tmerrit të punës moderne, mbetet favorit. “Adolescence”, drama e suksesshme e Netflix-it që ndjek rrugëtimin e një të riu të akuzuar për vrasje, është një tjetër kandidat serioz.
Produksionet apokaliptike “Pluribus”, “The Last of Us” dhe “The Pitt”, secila me kritikën e vet ndaj sistemit amerikan të kujdesit shëndetësor, pritet të marrin një numër të lartë nominimesh.
Ndërkohë, serialet e konsoliduara në arenën e çmimeve si “The White Lotus”, “The Bear” dhe “Only Murders in the Building” vazhdojnë të jenë të pritshme në çdo listë nominimesh, duke e çuar edhe një herë Parker Posey drejt mundësisë për t’u paraqitur me një veshje aq të çuditshme sa vetëm ajo mund ta mbajë.
Ceremonia e Çmimeve Golden Globe do të prezantohet nga komedianja Nikki Glaser dhe pritet të sjellë një mbrëmje të mbushur me surpriza, spektakël dhe shumë – shumë – ankth artistik.
Në këtë sezon çmimesh, duket se arti po e pasqyron më saktë se kurrë gjendjen emocionale të botës: frikë, tension dhe nevojë për kuptim.
(Burimi: CNN)
