Një ish-punonjës i Facebook-ut është nën hetim penal pasi dyshohet se ka shkarkuar rreth 30,000 imazhe dhe fotografi private të personave të ndryshëm sipas përzgjedhjes që bëri, sa ishte i punësuar në kompani.
Inxhinieri britanik i META-s besohet se ka hartuar një program që aksesonte fotografitë personale të abonentëve të Facebook-ut duke anashkaluar kontrollet e brendshme të sigurisë.
Një hetues nga njësia e krimit kibernetik të Policisë Metropolitane britanike po heton mbi ndërhyrjen masive ndaj privatësisë së përdoruesve të Facebook-ut.
META konfirmoi se shkelja që po hetohet u zbulua më shumë se një vit më parë dhe ishte vetë kompania që e referoi çështjen në polici në Mbretërinë e Bashkuar. META shtoi se përdoruesit e prekur të Facebook-ut janë njoftuar për këtë anomali dhe se punonjësi i saj ishte pushuar nga puna, duke njoftuar gjithashtu se ka marrë masa për të përmirësuar sistemet e sigurisë.
Inxhinieri i dyshuar, i cili jeton në Londër, aktualisht është në masë sigurie “me kusht” dhe ruhet nga policia ndërsa hetimi penal vazhdon.
Sipas dokumenteve të gjykatës, ai “dyshohet se ka aksesuar dhe shkarkuar afërsisht 30,000 imazhe dhe fotografi private që u përkisnin përdoruesve të Facebook-ut ndërsa punonte për META”.
Një zëdhënës i Metës konfirmoi ekzistencën e hetimit penal, duke deklaruar:
“Mbrojtja e të dhënave të përdoruesve është përparësia jonë kryesore. Pasi zbuluam akses të papërshtatshëm nga një punonjës më shumë se një vit më parë, ne menjëherë e pushuam atë individ nga puna, njoftuam menjëherë përdoruesit, dhe pasi e referuam çështjen në organet e drejtësisë forcuam masat tona të sigurisë. Ne po bashkëpunojmë me hetimin që është në vazhdim.”
Rrjedhja e fundit kibernetike për Meta-n, e cila zotëron edhe WhatsApp, vjen menjëherë pasi ajo pësoi një humbje të rëndësishme gjyqësore së bashku me Google muajin e kaluar, pasi u akuzua se nuk arriti të mbronte përdoruesit e saj nga dëmet.
Një gjykatë në Los Angeles i shpalli kompanitë përgjegjëse për varësinë e një gruaje nga mediat sociale gjatë fëmijërisë së saj, në një vendim që mund të ketë pasoja të gjera për mënyrën se si operojnë këto platforma gjigante në të ardhmen.
Meta u gjobit, gjithashtu, me 80 milionë paund nga Komisioni i Mbrojtjes së të Dhënave Personale në Irlandë në vitin 2024.
Ky komision zbuloi se miliona fjalëkalime të përdoruesve të Facebook dhe Instagram ishin ruajtur “pa dashje” në një rubrikë të thjeshtë në sistemet e tij të brendshme – që do të thotë se ato nuk ishin të mbrojtura nga enkriptimi.
