Një nga kryeveprat më të mëdha të dramaturgjisë botërore, “Hamleti” i Uilliam Shekspir, erdhi këtë fundjavë ne Teatrin Metropol përpara publikut në një interpretim të ri, bashkëkohor nën regjinë e Jonida Beqos. Kjo shfaqje shënon një qasje artistike të guximshme, ku klasikja modernizohet, duke krijuar një univers skenik plot tension, ndjeshmëri dhe simbolikë.
Regjia ndërtoi një atmosferë intensive emocionale, ku çdo skenë pulsoi me dramë dhe çdo personazh mbarti një peshë të thellë psikologjike. Publiku u përfshi në një udhëtim të brendshëm reflektimi mbi hakmarrjen, fatin, moralitetin, çmendurinë dhe dilemën ekzistenciale të njeriut përballë së vërtetës dhe ndërgjegjes së tij.
Në këtë “Hamlet”, pyetjet filozofike nuk mbeten vetëm fjalë, por shndërrohen në ndjesi, heshtje, shpërthime emocionale dhe tension të vazhdueshëm. Qasja regjisoriale e Jonida Beqos e zhvesh veprën nga tradicionalja dhe e afron atë me realitetin e sotëm, duke e bërë tragjedinë një pasqyrë të shqetësimeve universale dhe aktuale të njeriut modern.
Me një ndërlikim të pasur filozofik dhe psikologjik, “Hamleti” mbetet një vepër e përjetshme, e cila vazhdon të vihet në skenë në teatrot më të rëndësishme të botës, duke sfiduar brez pas brezi mendimin kritik dhe ndjeshmërinë artistike të publikut.
Një kast i gjerë aktorësh, aktruan me përkushtim dhe intensitet një mozaik karakteresh të fuqishme, duke i dhënë jetë një drame që mbetet po aq tronditëse sa herën e parë që u shkrua.
Aktorët: Amos Zaharia (në rolin e Hamletit), Kosovare Krasniqi, Viktor Zhusti (në rolin e mbretit), Yllka Mujo, Sokol Angjeli, Armela Demaj, Urim Aliaj, Xhino Musollari, Amri Hasanlliu, Ketjona Pecnikaj, Marius Dhrami, Edvin Mustafa, Jurgen Dervishi, Besmir Sula, Mario Bali, Adela Gjyla, Megi Duka, Silva Brahimataj, Deljana Topulli, Elion Guri.
Shfaqja zgjati 160 minuta dhe i dha publikut një përjetim emocional të pazakontë.
