Gjiganti holandez i birrës Heineken planifikon të shkurtojë deri në 7% të fuqisë së tij punëtore, ose rreth 5,000–6,000 vende pune gjatë dy viteve të ardhshme, në një përpjekje për të rritur efikasitetin përmes digjitalizimit dhe inteligjencës artificiale. Vendimi vjen pas një viti të vështirë për kompaninë, ku shitjet e birrës ranë me 2.4% gjatë 2025-ës, edhe pse fitimi operativ i rregulluar u rrit me 4.4%.
CEO në largim, Dolf van den Brink, deklaroi se “produktivititeti ka qenë prioritet kryesor” dhe se kompania synon kursime vjetore prej 400–500 milionë eurosh. Sipas tij, shkurtimet lidhen pjesërisht me përdorimin e teknologjisë dhe AI, e cila do të luajë një rol kyç në automatizimin e proceseve dhe zhvendosjen e rreth 3,000 roleve drejt shërbimeve të biznesit të centralizuara.
Strategjia “EverGreen 2030” e Heineken fokusohet te rritja, produktiviteti dhe përshtatja me të ardhmen, ndërsa kompania – që ka rreth 87 mijë punonjës dhe operon në mbi 70 vende – kërkon të investojë më shumë në markat premium dhe zgjerimin e tregut.
Shkurtimet në Heineken pasqyrojnë një trend më të gjerë global: inteligjenca artificiale po transformon tregun e punës. Vetëm në SHBA, AI u lidh me afro 55 mijë pushime nga puna gjatë vitit 2025, ndërsa kompani të mëdha si Amazon dhe Salesforce kanë pranuar se automatizimi po zëvendëson një pjesë të roleve tradicionale.
Drejtuesja e FMN-së, Kristalina Georgieva, ka paralajmëruar se AI po godet tregun e punës “si një cunami”, duke theksuar se shumica e vendeve dhe bizneseve nuk janë ende të përgatitura për këtë transformim. Në këtë kontekst, lëvizja e Heineken shihet si një tjetër sinjal se revolucioni teknologjik nuk është më një skenar i së ardhmes, por një realitet që po prek drejtpërdrejt mijëra punonjës.
