Grupi ndërkombëtar hotelier Hilton ka njoftuar se do të ndërpresë marrëdhënien me një hotel të licencuar në zonën e Minneapolis, pasi për herë të dytë stafi i tij refuzoi të pranojë për akomodim persona që pretendohej se ishin agjentë të Departamentit Amerikan të Sigurisë Kombëtare. Hoteli në fjalë, Hampton Inn by Hilton Lakeview Minneapolis, menaxhohet nga kompania private Everpeak Hospitality dhe nuk drejtohet drejtpërdrejt nga Hilton.
Vendimi i kompanisë qendrore erdhi pas publikimit të një videoje në rrjetet sociale, ku një punonjës i recepsionit shihet duke refuzuar rezervimin e dhomave për agjentёt, duke deklaruar se kjo ishte politikë e pronarëve. Ngjarja ndodhi vetëm pak orë pasi kompania menaxhuese kishte kërkuar ndjesë publike për një incident të mëparshëm, ku rezervimet e agjentëve të Departamentit Amerikan të Sigurisë Kombëtare ishin anuluar për shkak të përfshirjes së tyre në zbatimin e ligjeve të emigracionit.
Videoja u publikua nga gazetari i pavarur konservator Nick Sortor, i cili pretendoi se po përpiqej të rezervonte dhoma për rreth dhjetë punonjës të Departamentit të Sigurisë Kombëtare. Punonjësi i hotelit i tha se agjentët e emigracionit dhe të DSK-sё nuk pranoheshin në pronë dhe shtoi se kishte komunikuar drejtpërdrejt me pronarin, i cili nuk kishte dhënë asnjë udhëzim për ndryshim të politikës.
Në reagimin e saj zyrtar, Hilton deklaroi se ishte siguruar më herët nga pronarët e hotelit se problemi ishte zgjidhur, por se pamjet e publikuara ngritën shqetësime serioze se standardet dhe vlerat e markës nuk po respektoheshin. Për këtë arsye, kompania njoftoi se po merrte masa të menjëhershme për ta hequr hotelin nga sistemet e saj dhe për të ndërprerë bashkëpunimin.
Hilton theksoi se të gjitha pronat që mbajnë emrin e saj duhet të jenë të hapura për të gjithë dhe se nuk toleron asnjë formë diskriminimi. Kompania shtoi gjithashtu se po komunikon me të gjithë partnerët e saj të licencuar për të përforcuar standardet dhe për të shmangur raste të ngjashme në të ardhmen.
Ngjarja ka marrë përmasa politike në Shtetet e Bashkuara, pasi Minneapolis dhe shteti i Minnesotës janë prej kohësh në qendër të debatit mbi emigracionin. Administrata e presidentit Donald Trump ka akuzuar vazhdimisht komunitetin somalez në këtë zonë për mashtrime ndaj programeve federale, ndërsa autoritetet e sigurisë kanë njoftuar për hetime të gjera lidhur me dyshime për abuzime financiare.
Departamenti Amerikan i Sigurisë Kombëtare reagoi ashpër ndaj incidentit, duke akuzuar fillimisht Hilton për pengim të punës së forcave të rendit. Hilton u distancua menjëherë, duke sqaruar se hoteli ishte në pronësi private dhe se veprimet e tij nuk pasqyronin politikat dhe vlerat e kompanisë qendrore.
Shkëputja nga Hilton pritet të ketë pasoja të rënda për hotelin në fjalë, pasi humbja e markës nënkupton daljen nga sistemi global i rezervimeve dhe humbjen e besueshmërisë që sjell një emër ndërkombëtar. Rasti tregon se polarizimi politik dhe debatet mbi emigracionin në SHBA po ndikojnë gjithnjë e më shumë edhe në sektorë që tradicionalisht konsiderohen neutralë, si industria e mikpritjes.
(Burimi: CNBC)
