Autoritetet amerikane kanë njoftuar se i dyshuari për sulmin me armë në Brown University është gjetur i vdekur mbrëmjen e së enjtes në një objekt magazinimi në Salem, New Hampshire.
Sipas zyrtarëve, bëhet fjalë për Claudio Neves Valente, 48 vjeç, shtetas portugez dhe ish-student i Brown University, i cili ishte në kërkim pas të shtënave në kampusin universitar në Providence, Rhode Island.
I lidhur edhe me vrasjen e një profesori të MIT
Prokurorët amerikanë kanë konfirmuar se Neves Valente është i dyshuar gjithashtu pёr vrasjen e një profesori të Institutit të Teknologjisë në Massachusetts (MIT), ngjarje qё ka ndodhur disa ditë pas sulmit në Brown University. Sipas hetimeve, ai dhe profesori kishin ndjekur të njëjtin program akademik në Portugali në fund të viteve ’90.
Hetuesit thanë se lidhja mes dy ngjarjeve u zbulua vetëm në 48 orët e fundit, pasi i dyshuari kishte vepruar me kujdes ekstrem për të fshehur gjurmët.
Autoritetet: “I sofistikuar në fshehjen e gjurmëve”
Sipas Prokurores Federale për Distriktin e Massachusetts, Leah Foley, Neves Valente përdorte telefon të pagjurmueshёm, shmangte kartat e kreditit në emrin e tij dhe dyshohet se përdorte karta SIM evropiane, gjë që e bënte të vështirë gjurmimin në kohë reale.
Autoritetet po hetojnë gjithashtu përdorimin e një targe të rreme automjeti, që besohet se ishte e paregjistruar dhe me origjinë të panjohur.
Brown University: Nuk kishte lidhje aktive me universitetin
Presidentja e Brown University, Christina Paxson, deklaroi se Neves Valente nuk ishte student aktiv dhe nuk kishte asnjë lidhje aktuale me universitetin në momentin e sulmit.
Ai kishte ndjekur studime pasuniversitare në programin Sc.M–PhD në Fizikë vetëm për tre semestra, nga vjeshta e vitit 2000 deri në pranverën e vitit 2001, përpara se të largohej përfundimisht në vitin 2003, pa marrë diplomë.
Guvernatori i Rhode Island falënderon forcat e rendit
Guvernatori i Rhode Island, Dan McKee, vlerësoi bashkëpunimin mes policisë lokale, shtetërore dhe federale, duke e cilësuar hetimin si shembull profesionalizmi.
“Zemrat tona janë me viktimat dhe familjet e tyre, jetët e të cilëve janë ndryshuar përgjithmonë,” tha ai.
SHBA pezullon Lotarinë Amerikane pas zbulimit të detajeve për autorin
Në një zhvillim që ka ngjallur interes të madh ndërkombëtar, veçanërisht në vendet që përfitojnë nga emigrimi përmes lotarisë, Shtetet e Bashkuara kanë pezulluar programin e Diversity Visa (DV Lottery).
Sekretarja e Sigurisë Kombëtare, Kristi Noem, deklaroi se Neves Valente kishte hyrë në SHBA në vitin 2017 përmes Lotarisë Amerikane dhe ishte pajisur me green card.
“Në drejtimin e Presidentit Trump, kam urdhëruar pezullimin e menjëhershëm të programit DV1 për të garantuar sigurinë e amerikanëve,” shkroi Noem në platformën X.
Çfarë është Lotaria Amerikane?
Programi Diversity Visa lejon çdo vit deri në 55 mijë persona nga vende me emigrim të ulët drejt SHBA-së të fitojnë të drejtën për qëndrim të përhershëm. Programi ka qenë historikisht një nga rrugët kryesore të emigrimit ligjor për shqiptarët.
Ende nuk është bërë e qartë:
- nëse pezullimi do të jetë i përkohshëm apo afatgjatë,
- nëse do të preken fituesit aktualë ose aplikimet në proces, apo
- nëse programi do të ristrukturohet me kritere më të forta sigurie.
Ekspertë të emigracionit në mediat amerikane paralajmërojnë se çdo ndryshim afatgjatë në DV Lottery do të ketë ndikim të drejtpërdrejtë në mijëra familje që shpresojnë të emigrojnë ligjërisht në SHBA.
(Burime: CNN, Reuters, deklarata zyrtare të autoriteteve amerikane)
