Idris Elba, një nga aktorët më të paguar dhe më të dashur të Hollywood-it, ka surprizuar publikun duke treguar se është gati t’i japë fund aktrimit për t’iu përkushtuar dy pasioneve që po e thërrasin gjithnjë e më fort: regjizurës dhe botës së politikës. 53-vjeçari, i cili renditet mes aktorëve me fitime mbi 9.8 miliardë dollarë, foli hapur gjatë një seance pyetje-përgjigje në Festivalin Ndërkombëtar të Filmit në Detin e Kuq, ku u shfaq për të promovuar filmin e tij të ri të shkurtër, “Dust To Dreams”.
Elba shpjegoi se pas shumë vitesh në ekran, e ndjen se ka ardhur momenti të zhvendoset prapa kamerës. Të bërit regji, thotë ai, i jep një lloj lirie krijuese që aktrimi nuk ia ofron më. Projekti i tij i ri, i dyti si regjisor pas filmit “Yardie”, tregon historinë e një vajze të re që trashëgon një klub nate në Lagos dhe ribashkohet papritur me të atin e saj, rol që luhet nga këngëtari Seal.
Por, përtej botës së kinemasë, Idris Elba ka treguar se e tërheq edhe politika, megjithëse pranon se shpesh është ndier jashtë vendit kur gjendet në tryezë me krerë shtetesh dhe ministra. Ai thotë se nuk synon të bëhet politikan, por nuk e përjashton mundësinë për t’u rikthyer në shkollë dhe për të studiuar shkencat sociale, që të mund të kuptojë më mirë mekanizmat e ndikimit shoqëror dhe të jetë më i efektshëm në punën e tij filantropike e aktiviste. Elba beson fort në potencialin e Afrikës në media, modë dhe muzikë, dhe e sheh veten si pjesë të këtij transformimi kulturor.
Megjithatë, ndonëse flet për të ardhmen larg aktrimit, Idris Elba nuk duket aspak pranë pensionit. Është duke u zhvilluar një film i dytë për “Luther”, një vijim i “The Fallen Sun”, duke treguar se ndarjen me ekranin ai e mendon më shumë si një tranzicion të ngadaltë se sa një kapitull të prerë.
(Burimi: Daily Mail)
