Një inxhiniere biomjekësore nga Kolorado po punon për një teknologji që mund të ndryshojë mënyrën se si trajtohen pasojat fizike dhe psikologjike të kancerit të gjirit. Katie Weimer, CEO e startup-it GenesisTissue, ka nisur një mision personal dhe profesional për të krijuar inde gjiri të printuara në 3D, me synimin që gratë që i mbijetojnë sëmundjes të kenë mundësi rindërtimi më natyral dhe më të sigurt.
Frymëzimi i saj lidhet drejtpërdrejt me humbjen e nënës, e cila ndërroi jetë nga kanceri i gjirit në moshën 50-vjeçare, kur Weimer ishte vetëm 15 vjeç. Dekada më vonë, përparimet në mjekësinë rigjeneruese dhe bioprintimin e shtynë të mendonte për një zgjidhje që do të rikthente jo vetëm formën fizike, por edhe dinjitetin e pacienteve.
Ideja është ndërtimi i “skeleteve” të indeve të gjirit përmes printerëve 3D, duke përdorur materiale biokompatibile që trupi nuk i refuzon. Kirurgët do të marrin qeliza yndyrore nga vetë pacientja dhe do t’i injektojnë në këtë strukturë, e cila më pas ndihmon në rritjen e indit natyral. Me kalimin e kohës, materiali shpërbëhet dhe mbetet vetëm indi i krijuar nga trupi.
“Shumë gra jetojnë çdo ditë me një kujtesë të dukshme të kancerit. Kjo nuk është e mjaftueshme – duhet të ketë një mënyrë më të mirë,” është shprehur Weimer, duke theksuar se çdo paciente meriton një rindërtim që e bën të ndihet e plotë sërish.
Nevoja është e madhe: mbi 300 mijë gra diagnostikohen çdo vit me kancer gjiri në SHBA, ndërsa globalisht shifra arrin rreth 2.3 milionë raste. Shumë prej tyre i nënshtrohen lumpektomisë ose mastektomisë, ndërhyrje që shpesh lënë deformime të përhershme dhe ndikim të fortë psikologjik.
Zgjidhja e GenesisTissue synon të personalizohet për çdo paciente. Skanimet kompjuterike përcaktojnë madhësinë dhe formën e nevojshme, ndërsa printeri 3D krijon një strukturë të përshtatur saktësisht për trupin. Sipas Weimer, kjo shmang përdorimin e implanteve standarde dhe ul rrezikun e refuzimit apo komplikacioneve afatgjata.
Teknologjia ende nuk është në treg. Të dhënat paraprake laboratorike dhe paraklinike duken premtuese, por hapi i radhës janë provat klinike dhe miratimi rregullator nga autoritetet shëndetësore. Ekspertët e fushës e shohin potencialin e saj si një “ndryshues loje” për rindërtimin e gjirit.
Fusha e bioprintimit po avancon me ritme të shpejta. Në vitet e fundit janë zhvilluar projekte si një trake e printuar në 3D për një paciente në Korenë e Jugut dhe kërkime për mëlçi funksionale të personalizuara. Studiues në Harvard, si edhe kompani në Evropë dhe Australi, po eksplorojnë gjithashtu përdorimin e kësaj teknologjie për rindërtimin e indeve të gjirit.
Weimer nuk pretendon se është e para në këtë garë shkencore, por beson se bëhet fjalë për një lëvizje globale ku kërkuesit po punojnë drejt të njëjtit qëllim: përmirësimin e jetës së pacienteve.
Me një karrierë të gjatë në printimin 3D për planifikimin kirurgjikal, ajo ka ndihmuar edhe në operacione komplekse, përfshirë ndarjen historike të binjakëve të bashkuar në kokë në vitin 2016. Mentor i saj ka qenë Charles Hull, shpikësi i printerit 3D, i cili e ka nxitur të përdorë inovacionin për të mirën e njerëzimit.
Për Weimer, ky projekt është më shumë se një arritje teknologjike – është një mënyrë për të nderuar nënën e saj dhe për të sjellë ndryshim real për gratë në mbarë botën.
“Humbja e saj më transformoi. Sot shpresoj që kjo rrugë të sjellë një transformim për gratë kudo,” thotë ajo, duke besuar se inovacioni mund të kthehet në shpresë të prekshme për mijëra paciente.
(Burimi: CNN)
