India ka shënuar një tjetër arritje madhore në fushën e hapësirës, duke lëshuar satelitin më të rëndë ndonjëherë nga territori i saj, njoftoi Indian Space Research Organisation (ISRO).
Lëshimi u realizua përmes raketës LVM3-M6, e cila transportoi me sukses satelitin e komunikimit AST SpaceMobile, të ndërtuar në Shtetet e Bashkuara. Sateliti u nda nga raketa sipas planit dhe hyri pa probleme në orbitën e ulët të Tokës.
Kryeministri indian Narendra Modi e cilësoi këtë ngjarje si një “moment të rëndësishëm në udhëtimin hapësinor të Indisë”. Ai theksoi se operacioni demonstron aftësitë e vendit në lëshimin e raketave të rënda dhe forcon rolin e Indisë në tregun global të shërbimeve hapësinore komerciale.
Sipas Modit, ky sukses konfirmon ambicien e Indisë për t’u kthyer në një nga aktorët kryesorë në industrinë hapësinore ndërkombëtare, jo vetëm në misione shkencore, por edhe në bashkëpunime komerciale me kompani dhe shtete të tjera.
India planifikon gjithashtu të realizojë një mision pa pilot në hapësirë në muajt e ardhshëm, si pjesë e përgatitjeve për misionin e saj të parë me astronautë, i cili pritet të zhvillohet në vitin 2027. Ndërkohë, qeveria indiane ka shpallur si objektiv afatgjatë dërgimin e një ekuipazhi indian në Hënë deri në vitin 2040.
(Burimi: TGCOM)
