Dy të rinj amerikanë nga Teksasi, Gavin Rivers Weisenburg 21 vjeç dhe Tanner Christopher Thomas 20 vjeç, u arrestuan pasi hetimet federale zbuluan një plan të frikshëm që ata kishin përgatitur për muaj të tërë: pushtimin me armë të ishullit haitian Gonave, eliminimin e të gjithë burrave atje dhe nënshtrimin e grave e të miturve duke i kthyer në skllevër për seks. Sipas dokumenteve të prokurorisë amerikane, dyshja diskutonte hapur strategjinë e tyre kriminale, duke ndërtuar një vizion të errët ku ata do të kontrollonin popullsinë me dhunë dhe frikë. Nuk bëhej fjalë për një ide të çastit apo fantazi të çmendur adoleshentësh — por për një skenar të përgatitur me detaje ushtarake.
Në javët e para të vitit 2025, Thomas u rekrutua në Forcat Ajrore të SHBA-së me qëllimin e qartë për të marrë aftësi luftarake që do t’i shërbenin operacionit të tyre makabër. Ndërkohë Weisenburg kërkonte kurse navigimi, trajnim zjarrfikësish dhe çdo mënyrë tjetër për të fituar përgatitje taktike. Të dy, gjatë gjithë kësaj periudhe, mblidhnin informacione, pajisje, madje përpiqeshin të rekrutonin njerëz të pastrehë në rrugët amerikane, të cilëve u premtonin role ushtarake në “pushtimin e madh”.
Për autoritetet, më e frikshme është se plani ka nisur që në gusht 2024 dhe ishte modifikuar vazhdimisht, ndërsa dyshja analizonte harta, distanca dhe dobësitë infrastrukturore të ishullit. Gonave, sipas tyre, ishte objektiv ideal: i izoluar, me pak forca sigurie dhe me një popullsi që nuk do të kishte mundësi të mbrohej. Ata besonin se autoritetet haitiane nuk do të arrinin të reagonin në kohë.
Në komunikimet e përgjuara, dy të rinjtë flisnin pa asnjë hezitim për shfarosjen e të gjithë burrave të ishullit, duke e konsideruar atë si hapi i parë drejt vendosjes së kontrollit absolut. Ndërkohë planifikonin një skemë shfrytëzimi e nënshtrimi seksual të grave dhe të miturve, të organizuar mirë që do zgjaste në kohë pa limit. Hetuesit e përshkruajnë të gjithë këtë si një plan që i kalonte kufijtë e imagjinatës njerëzore, ku fantazia kriminale përzihej me ambicie terroriste.
Sot, Weisenburg dhe Thomas po përballen me akuza të shumta federale: nga komploti për të kryer vrasje në një territor të huaj — një krim që dënohet deri me burgim të përjetshëm — deri te akuzat për shfrytëzim seksual të të miturve, të cilat parashikojnë dënime që shkojnë nga 15 deri në 30 vjet burg. Një plan monstruoz i ndalur në kohë, para se ky ishull i qetë i Haitit të kthehej në skenën e një tragjedie të paparë.
(Burimi: Tgcom)
