JD Vance ka habitur me deklaratat e tij të fundit, duke thënë se nuk beson se alienët janë qenie jashtëtokësore, por i konsideron ata si “demonë”.
Zëvendëspresidenti amerikan i bëri këto komente gjatë një interviste në podkastin “The Benny Show”, ku pranoi gjithashtu se ka një interes të madh për fenomenet e objekteve fluturuese të paidentifikuara, të njohura si UAP.
“Nuk kam pasur ende kohë të mjaftueshme për t’u thelluar, por do ta bëj. Më besoni, jam i fiksuar pas kësaj”, tha ai, duke treguar një entuziazëm të veçantë për këtë temë.
Vance e lidhi këtë interes edhe me bindjet e tij fetare, duke sugjeruar se fenomenet që shpesh përshkruhen si jashtëtokësore mund të kenë një shpjegim tjetër. Sipas tij, shumë fe, përfshirë krishterimin, pranojnë ekzistencën e forcave të pashpjegueshme, si të mira ashtu edhe të këqija.
“Qenie që vijnë nga qielli dhe bëjnë gjëra të çuditshme – shpesh njerëzit i quajnë alienë, por unë mendoj ndryshe”, u shpreh ai, duke shtuar se një nga “truket më të mëdha të djallit” është t’i bindë njerëzit se ai nuk ekziston.
Deklaratat e tij vijnë në një kohë kur debati mbi UAP-et është rikthyer fuqishëm në SHBA. Presidenti Donald Trump ka premtuar publikimin e dosjeve të qeverisë që lidhen me këto fenomene, ndërsa më herët edhe ish-presidenti Barack Obama u përfshi në diskutim, duke sqaruar se gjatë mandatit të tij nuk kishte parë prova për ekzistencën e alienëve.
Ndërkohë, regjistrimi i domeneve zyrtare si “alien.gov” dhe “aliens.gov” nga agjencitë amerikane ka shtuar edhe më shumë spekulimet për atë që mund të dijë realisht qeveria për këto fenomene.
Vance premtoi se do t’i shkojë “deri në fund” kësaj çështjeje, duke lënë të hapur mundësinë për më shumë transparencë mbi dosjet e shumëdiskutuara të UFO-ve.
(Burimi: The Guardian)
