Ka një lider të ri në botën e podkasteve në Shtetet e Bashkuara. Sipas Apple, “The Joe Rogan Experience” shpallet podkasti më i dëgjuar i vitit, duke rrëzuar nga froni programin shumëvjeçar “The Daily” të The New York Times. Vitin e kaluar Rogan renditej i treti, ndërsa këtë vit ngjitet në krye të listës vjetore të Apple për më të ndjekurit në Amerikë. “The Daily” zbret në vend të dytë, ndërsa surpriza më e madhe është “The Mel Robbins Podcast”, i cili vitin e kaluar nuk ishte fare në top 10, por këtë vit ngjitet direkt në vendin e tretë.
Në listën e këtij viti hyjnë për herë të parë “Call Her Daddy” i Alex Cooper në vendin e shtatë dhe “The Ezra Klein Show” në vendin e dhjetë. Ndërkaq podkastet e njohura “Crime Junkie”, “Dateline NBC”, “SmartLess”, “This American Life” dhe “Huberman Lab” mbeten ende ndër më të dëgjuarit.
Joe Rogan vazhdon të mbetet një nga figurat më të mëdha të industrisë, me episode që zgjasin deri në tre orë dhe që tërheqin miliona dëgjues dhe ndjekës në platforma të ndryshme. Ai aktualisht renditet i pari edhe në tabelën javore të YouTube për podkastet më të ndjekura.
Mel Robbins shënon një rritje të jashtëzakonshme, duke u katapultuar në vendin e tretë pas një viti ku nuk figuronte fare në klasifikim.
Edhe pse Rogan dhe disa podkastë të tjerë trajtojnë shpesh tema politike, mes të cilave debatet rreth Donald Trump, shumë prej programeve më të dëgjuara fokusohen në histori të krimeve të pazgjidhura, mistere dhe formate bisede me të famshëm. Ndër risitë e këtij viti janë edhe programe të drejtuara nga figura të njohura të showbiz-it, si “Good Hang with Amy Poehler” dhe “Not Gonna Lie with Kylie Kelce”.
Në klasifikimin e episodeve më të dëgjuara të vitit, vendin e parë e mban episodi nga “The Telepathy Tapes”, i dyti është nga “Crime Junkie”, i treti intervista e Taylor Swift në “New Heights”, i katërti episodi me Elon Musk te Rogan dhe i pesti një episod i “The Daily” me fokus Donald Trump.
Në një treg që po rritet me ritme të shpejta, Joe Rogan konfirmon sërish pozicionin e tij si figura më dominuese e botës së podkasteve, duke thyer rekorde të reja dëgjueshmërie.
