Një ligj i ri në Canada ka shkaktuar reagime të forta nga organizatat e të drejtave të njeriut, të cilat paralajmërojnë se ai mund të kufizojë ndjeshëm të drejtat e refugjatëve dhe emigrantëve.
Bëhet fjalë për projektligjin Bill C-12, i cili hyri në fuqi së fundmi dhe sipas kritikëve përbën një “sulm të drejtpërdrejtë” ndaj mbrojtjes së azilkërkuesve. Më shumë se 20 organizata, përfshirë Amnesty International Canada dhe Canadian Civil Liberties Association, paralajmërojnë se ligji mund të vendosë mijëra njerëz në rrezik përndjekjeje, dhune dhe pasigurie.
Ndryshimet kryesore lidhen me kufizimin e aksesit në procedurat e azilit. Sipas ligjit, personat që aplikojnë për azil më shumë se një vit pasi kanë hyrë në vend nuk do të kenë më të drejtë për një dëgjim të plotë, por vetëm një vlerësim paraprak rreziku – një procedurë që aktivistët e konsiderojnë të pamjaftueshme.
Ligji gjithashtu i jep qeverisë kompetenca të gjera për të anuluar dokumente emigracioni, përfshirë vizat, lejet e punës apo studimit, nëse kjo konsiderohet në “interes publik”. Për kritikët, kjo hap rrugën për vendime arbitrare dhe rrit pasigurinë për emigrantët.
Nga ana tjetër, qeveria e kryeministrit Mark Carney e mbron ligjin si një masë të nevojshme për të ulur presionin mbi sistemin e emigracionit dhe për të forcuar kontrollin kufitar. Ministrja për Emigracionin, Lena Diab, deklaroi se ndryshimet synojnë ta bëjnë sistemin “më të drejtë dhe efikas”.
Megjithatë, shqetësimet kanë kaluar edhe në nivel ndërkombëtar. United Nations Human Rights Committeeka paralajmëruar se ligji mund të dobësojë mbrojtjen për refugjatët dhe ka kërkuar që Kanadaja të garantojë akses të plotë dhe të drejtё në procedurat e azilit.
Në terren, efektet e këtij debati ndihen tashmë. Në protesta të zhvilluara në Montreal, aktivistët raportojnë rritje të ankthit dhe pasigurisë mes emigrantëve, të cilët druhen se mund të humbasin mundësinë për të qëndruar në vend.
Ligji vjen në një moment kur qëndrimet ndaj emigracionit në Kanada janë bërë më të ashpra, mes debatesh për krizën e strehimit dhe sfidave ekonomike. Por për organizatat e të drejtave të njeriut, politikat e reja rrezikojnë të cenojnë parimet bazë të mbrojtjes së refugjatëve.
(Burimi: Al Jazeera)
