Kate Winslet, ylli i përjetshëm i “Titanic”, ka dhënë një nga deklaratat më të forta të viteve të fundit mbi presionin e pamjes fizike, kirurgjinë plastike dhe fiksimin modern për “perfeksion”. Në një intervistë të sinqertë për The Times, aktorja 50-vjeçare nuk e fshehu zhgënjimin për valën e ndërhyrjeve estetike që ka pushtuar gratë e reja në mbarë botën. Ajo e quajti këtë fenomen “të tmerrshëm, shkatërrues dhe tepër alarmues”.
Winslet, e njohur për qëndrimin e saj të hekurt kundër Botox-it dhe çdo lloj operacioni plastik, thotë se sot vajzat rriten me një ide të rreme të bukurisë — një bukuri që matet nga filtrat, pamjet perfekte dhe pëlqimet në Instagram.
“Gratë e reja nuk e kanë më idenë se çfarë do të thotë të jesh vërtet e bukur,” tha ajo. “Është krijuar një kaos i mallkuar… Një fiksim me një pamje që nuk ekziston.”
Aktorja shprehu shqetësim të madh për normalizimin e mbushësve, ndërhyrjeve estetike dhe tashmë edhe ilaçeve të humbjes së peshës. Sipas saj, kur vetëvlerësimi i një personi varet tërësisht nga fytyra apo trupi, atëherë shoqëria ka humbur kontrollin.
“Është e frikshme,” tha Winslet. “Po e humbasim krejt konceptin e bukurisë së natyrshme.”
Ajo shtoi se disa nga gratë më të bukura që njeh janë mbi 70 vjeç — dhe se pikërisht natyraliteti i tyre, jo ndërhyrjet, i bën ato kaq të paharrueshme. Kjo është arsyeja pse Winslet refuzoi vitin e kaluar të “fshehë barkun e rrumbullakosur” gjatë xhirimeve të filmit Lee, edhe pse një anëtar i ekipit i kërkoi ta bënte. “Fytyra ime tregon jetën që kam jetuar, dhe kjo ka rëndësi,” dëshmoi ajo.
Aktorja ka folur shpesh kundër kirurgjisë plastike, duke theksuar se ajo bie ndesh me vlerat me të cilat është rritur dhe me idenë e saj për bukurinë natyrale. Për të, gjumi, shëndeti dhe hidratimi janë “sekretet e vetme të vërteta të freskisë”. “Uji është gjithçka. Ujë, ujë, ujë,” thotë ajo me humor. “Po të jeni të lodhura, asnjë makijazh nuk e fshin dot këtë.”
Në një intervistë për Vogue, Winslet ka demaskuar hapur mitin e pamjes së përsosur hollivudiane:
“Dua t’u them grave që përpiqen të imitojnë tapetin e kuq: është një mashtrim. Ato gra kanë kaluar orë të tëra me grimierë, parukierë dhe trajtime fytyre. Nuk është realitet.”
Sipas saj, bukuria është një gjendje mendore, jo një filtër. “Bukuria e vërtetë vjen nga brenda,” tha aktorja. “Dhe ndaloni së kritikuari veten. Kjo është arma më e rëndësishme që kemi.”
(Burimi: Daily Mail)
