Një festë ditëlindjeje familjare u kthye në natë tmerri në Stockton të Kalifornisë, ku një sulm i armatosur masiv la katër persona të vdekur (të moshës 8, 9, 14 dhe 21 vjeç) dhe 11 të plagosur, ndërsa autori ose autorët janë ende në arrati. Ngjarja ndodhi të dielën pak para orës 18:00, në një sallë banketesh ku ndodheshin rreth 100–150 persona që festonin ditëlindjen e një fëmije të vogël.
Sipas Zyrës së Sherifit të Qarkut San Joaquin, sulmi duket se ishte i planifikuar, por motivi mbetet i paqartë. Policia ka vendosur një shpërblim prej 25 mijë dollarësh për këdo që jep informacion pёr rastin. Pesë persona janë ndaluar për shkelje të ligjit të armëve dhe dyshime për lidhje me banda, por deri tani nuk ka prova që lidhen me të shtënat.
Autoritetet dhe komuniteti kanë bërë thirrje urgjente për bashkëpunim. “Ky ishte një sulm i tmerrshëm ndaj fëmijëve dhe familjeve,” tha zëdhënësja Heather Brent. Kryetarja e bashkisë, Christina Fugazi, deklaroi se qyteti është “i shkatërruar emocionalisht” dhe se të prekurve do t`i ofrohet mbështetje psikologjike.
Ngjarja në Stockton është vetëm një shembull i dhimbshëm i epidemisë së dhunës me armë në SHBA. Sipas Gun Violence Archive, pёr vitin 2025 janë regjistruar të paktën 380 të shtëna masive – në një kohë kur viti ende nuk ka mbaruar.
Në SHBA debati është i ndarë midis mbështetësve të kontrollit të armëve, që kërkojnë ligje më të rrepta për blerjet e armëve, kufizime për armët automatike dhe verifikime të thella të prejardhjes; dhe atyre që mbrojnë armëmbajtjen si të drejtë kushtetuese.
Ndërsa politika debaton, realiteti në terren është i frikshëm: familjet humbasin fëmijët e tyre në evente normale të jetës – në shkolla, qendra tregtare, festa familjare dhe aktivitete sportive.
Vrasjet e fëmijëve nga armët e zjarrit janë tashmë shkaku kryesor i vdekjes tek të miturit amerikanë, duke tejkaluar aksidentet automobilistike. Ekspertët pohojnë se “çdo ditë e humbur në diskutime politike është një jetë e humbur në komunitete”.
Tragjedia e Stockton është një thirrje e fortë alarmi, sidomos në një vend që përgatitet të presë Kupën e Botës 2026, duke ngritur pyetje për sigurinë publike dhe masat urgjente goditëse ndaj krimit me armë.
(Burimi CNN)
