Një rast tronditës ka dalë në dritë në periferi të Filadelfias, ku policia zbuloi një aktivitet të paligjshëm të tregtimit të mbetjeve njerëzore, i lidhur me një rrjet ndërkombëtar koleksionistësh.
Hetimi nisi në fillim të janarit, pasi autoritetet vunë re një automjet të dyshimtë pranë varrezës historike Mount Moriah. Pas disa javësh vëzhgimi, policia bastisi banesën e 34-vjeçarit Jonathan Christ Gerlach, ku në bodrum u gjetën mbi 100 mbetje njerëzore – përfshirë kafka dhe kocka – të ruajtura në kuti dhe qese.
Sipas prokurorisë, mbetjet ishin vjedhur gjatë muajit nëntor nga të paktën 26 varre në varrezën Mount Moriah, një vend historik i themeluar në vitin 1885. Kockat i përkisnin personave të varrosur në periudha të ndryshme, përfshirë gra, burra dhe fëmijë.
Gjatë kontrollit në banesë u gjetën gjithashtu bizhuteri, që dyshohet se u përkisnin të ndjerëve. Prokurori i çështjes e përshkroi skenën si “jashtë çdo norme ligjore dhe morale”.
Hetuesit zbuluan më pas se Gerlach ishte aktiv në një grup privat në Facebook me emrin “Human Bones and Skulls for Sale”, ku ai ofronte pjesë të koleksionit për shitje dhe komunikonte me blerës nga disa vende perëndimore.
Sipas ekspertëve, tregu i koleksionimit të mbetjeve njerëzore ekziston prej dekadash dhe në disa shtete perëndimore blerja e kockave nga burime të licencuara është ende ligjërisht e lejueshme. Kjo ka krijuar hapësirë për treg të zi dhe grabitje varresh, ku çmimet mund të arrijnë mijëra dollarë për një ekzemplar.
Jonathan Christ Gerlach është arrestuar dhe akuzohet për përdhosje varresh, vjedhje, hyrje të paligjshme në varreza historike dhe trafikim sendesh të vjedhura. Hetimet vazhdojnë për të identifikuar blerësit dhe rrjetin e plotë të shpërndarjes.
(Burimi: ANSA)
