Kosova hyn zyrtarisht në një fazë tranzicioni institucional, pasi Vjosa Osmani përfundon sot mandatin e saj pesëvjeçar si presidente, duke ia dorëzuar detyrën kryetares së Kuvendit, Albulena Haxhiu.
Ceremonia e dorëzim-pranimit do të zhvillohet në orën 16:00 në kabinetin e Presidencës, duke formalizuar kalimin e kompetencave në një moment kur vendi ende nuk ka zgjedhur kreun e ri të shtetit.
Me këtë akt, Haxhiu merr përkohësisht funksionin e presidentes, në cilësinë e ushtrueses së detyrës, një rol që Kushtetuta e lejon për një periudhë deri në 6 muaj. Megjithatë, kjo situatë shihet më shumë si pasojë e një ngërçi politik sesa një tranzicion i zakonshëm institucional.
Kuvendi i Kosovës ka afat deri më 28 prill për të zgjedhur presidentin e ri, një afat i përcaktuar nga Gjykata Kushtetuese pas rrëzimit të dekretit të Osmanit për shpërndarjen e Kuvendit. Ky vendim erdhi pasi u konstatua se procedura për zgjedhjen e presidentit kishte nisur më 5 mars, kur dështoi votimi për shkak të mungesës së kuorumit.
Në këtë klimë politike të paqartë, kryeministri Albin Kurti ka zhvilluar kontakte me liderët e opozitës për të gjetur një zgjidhje, por deri tani pa rezultat konkret.
Ndërkohë, largimi i Osmanit shënon fundin e mandatit të saj si presidentja e gjashtë e Kosovës, një funksion që e mori në vitin 2021 pas ardhjes në pushtet të Lëvizjes Vetëvendosje. Ajo ka lënë të hapur mundësinë e një angazhimi të mëtejshëm politik, në rast se nuk arrin të rikthehet për një mandat të dytë.
Kalimi i përkohshëm i kompetencave te kryeparlamentarja nuk shihet si një zgjidhje e qëndrueshme, por si një zgjatje e krizës politike, që po e lë vendin pa një figurë të zgjedhur në krye të shtetit në një moment delikat institucional.
