Kryeministri i Kosovës Albin Kurti vizitoi një kompani të prodhimit të dronëve në Gjilan, nga ku reklamoi aftësinë e Kosovës për të ndërtuar vetë dronët luftarake dhe ata civilë “Made in Gjilan” apo “Made in Kosova”.
“Të ardhmen e industrisë së mbrojtjes dhe avancimit të dronëve luftarakë po e ndërtojmë e zhvillojmë edhe në Kosovë. Shteti ynë po shndërrohet në vend që prodhon” – tha kryeministri Kurti jo pa krenari, teksa vizitoi ambientet e showroomit të kompanisë kosovare me qendër në Gjilan.
Kompania e prodhimit të dronëve është specializuar që nga krijimi dhe prodhimi i dronëve ushtarakë, të quajtur “Skifteri”, dhe dronëve civilë, të quajtur “Future Minds Academy” dhe MIGA SkyShield MAR.
Kompania ka arritur të prodhojë edhe dronin e parë kamikaz, të quajtur “K1” (Kosova 1), i cili mund të arrijë shpejtësi maksimale prej 180 km/h e të operojë në lartësi deri në 2,500 metra.
Ndërsa droni tjetër me emrin “Skifteri” mund të arrijë në 5,000 metra lartësi, një hapësirë operative 20 km dhe një shpejtësi prej 270 km/h.
Në këtë prezantim dhe njëkohësisht reklamim të pajisjeve të teknologjisë së lartë luftarake, kryeministri Kurti tha se “Në mbrojtje e siguri kemi investuar duke blerë nga shtetet tona mike dhe partnere dronët Bayraktar TB-2, Puma dhe së fundmi dronët kamikazë Skydagger. Tash dronët luftarakë po i prodhojmë edhe vetë. Si qeveri, edhe në nivel qendror edhe lokal, do ta mbështesim dhe përkrahim ngritjen e kapaciteteve dhe prodhimtarisë, gjersa nuk do t’i ndalim investimet për mbrojtje e siguri.”
Me prodhimin në vend të kësaj teknologjie të lartë lufte, shteti i Kosovës jep mesazhin e vendosmërisë dhe vigjilencës të lartë, për të mbrojtur kufijtë e tij në çdo rast të papritur, nga ndonjë inkursion ushtarak, në mënyrë të veçantë nga fqinjët e veriut.
