Kryeministri bullgar Rossen Jeliazkov njoftoi dorëheqjen e qeverisë së tij ditёn e sotme, pas më pak se një viti në detyrë, duke u përkulur ndaj valës së fuqishme të protestave anti-korrupsion që kanë përfshirë vendin.
Dorëheqja erdhi pak para se parlamenti të votonte një mocion mosbesimi të paraqitur nga opozita. Që prej fund-shkurtit, dhjetëra mijëra qytetarë në të gjithë Bullgarinë kanë dalë çdo javë në rrugë, të indinjuar nga projektbuxheti i vitit 2026, të cilin e konsideronin si një mënyrë për të fshehur korrupsionin galopant brenda qeverisë.
Edhe pse qeveria e tërhoqi projektbuxhetin javën e kaluar, zemërimi popullor nuk u shua.
“Qeveria jep dorëheqjen sot,” deklaroi Jeliazkov pas takimit me partitë e koalicionit. “Njerëzit e të gjitha moshave, prejardhjeve dhe besimeve kërkuan largimin tonë. Kjo energji qytetare duhet mbështetur dhe inkurajuar.”
Bullgaria, vendi më i varfër i Bashkimit Europian, pritet të anëtarësohet në eurozonë më 1 janar — proces që, sipas analistëve, do të vijojë pavarësisht krizës politike. Megjithatë, shqetësimet për rritjen e çmimeve dhe mungesën e besimit tek institucionet kanë thelluar edhe më shumë pakënaqësinë.
Sociologu Dobromir Jeliazkov tha për AFP se shoqëria bullgare po tregon një unitet të gjerë kundër modelit aktual të qeverisjes, duke theksuar se “besimi ndaj qeverisë dhe parlamentit ndodhet pranë niveleve historike më të ulëta”.
Të mërkurën, mbi 10 mijë qytetarë u mblodhën vetëm para parlamentit në Sofje, duke mbajtur pankarta me mesazhin: “Mjaft më!”. Shumë prej tyre, kryesisht të rinj, thonë se korrupsioni i ka detyruar miqtë e tyre të largohen nga vendi — një plagë e vjetër për Ballkanin.
Bullgaria renditet ndër vendet më të korruptuara në BE sipas Transparency International. Në dekadën e fundit, vendi ka kaluar nëpër shtatë zgjedhje të parakohshme, shpesh të shkaktuara nga kriza të njëjta si kjo: zemërimi popullor ndaj qeverive të akuzuara për korrupsion.
Kur populli ndihet i mashtruar dhe i vjedhur, rruga bëhet institucioni i fundit ku kërkohet drejtësi. Këtë bullgarët e kuptuan dhe e treguan me zë të lartë.
Dikush mund të thotë se është një mësim që shumë shoqëri — përfshirë tonën — ende hezitojnë ta mësojnë.
(Burimi: France 24 / AFP)
