Tirana u zgjua sot e mbërthyer nga trafiku, ku çdo rrugë dukej si një parking gjigant nën qiell të hapur. Makina që nuk lëvizin, boritë që s’pushuan për orë të tëra dhe shoferë që humbën durimin – ky ishte realiteti në çdo hyrje e dalje të kryeqytetit.
Shkaku? Punimet e nisura në autostradën Tiranë–Durrës, që prej disa ditësh ishin paralajmëruar, por sot kulmuan me një kaos të plotë.
Në segmentin Vorë–Maminas, raportimet flasin për radhë që shkonin deri në 15 kilometra, me njerëz që thjesht fiknin motorin dhe prisnin. Në disa zona, lëvizja ishte aq e ngadaltë sa mund të ecje më shpejt në këmbë.
Ndërkohë, Policia e Tiranës reagoi me një njoftim që më shumë se zgjidhje, tingëllonte si lutje: “Shoferët të tregojnë durim dhe të respektojnë sinjalistikën”. Patrulla, kontrolle, udhëzime – të gjitha në letër. Në terren, realiteti mbeti i njëjtë: bllokim total.
Qytetarët, të irrituar, akuzojnë mungesën e koordinimit mes institucioneve dhe kërkojnë një plan konkret për menaxhimin e situatave të tilla. “Nuk është hera e parë që Tirana paralizohet nga punimet, por duket se askush s’mëson asgjë,” thotë një shofer që kishte mbetur në trafik për më shumë se 90 minuta.
E keqja? Kjo mund të jetë vetëm “prova e parë”. Punimet në autostradë do të vazhdojnë edhe në ditët në vijim, në segmente të tjera, duke lënë të hapur mundësinë që nesër të jetë edhe më keq.
Në një qytet ku durimi është bërë diҫka e rrallë, Policia kërkon më shumë “qetësi” – por ndoshta ajo që duhet është diҫka tjetёr.
