Tirana vishet me kostumin e saj më të bukur tradicional dhe ngjitet në skenë. Më 19 janar, në orën 19:00, Teatri Kombëtar i Operës, Baletit dhe Ansamblit Popullor sjell premierën e shfaqjes “Ku ka si Tirona”, një udhëtim artistik që i kushtohet historisë, ritmit dhe identitetit të kryeqytetit.
Shfaqja vjen si një mozaik këngësh, vallesh dhe interpretimesh skenike, ku Tirana rrëfehet përmes melodive të njohura, elegancës së valles qytetare dhe kujtesës kolektive që kalon nga brezi në brez. Një homazh i gjallë për një qytet që ka ditur të ruajë shpirtin e vet, edhe mes ndryshimeve të kohës.
Në këtë premierë marrin pjesë solistë vokalë, valltarë dhe të ftuar specialë, mes tyre Irma Libohova, Arnaldo Kllogjeri dhe Greta Zani, si edhe një trupë e gjerë artistësh që sjellin në skenë energjinë e traditës shqiptare.
“Ku ka si Tirona” shënon gjithashtu nisjen e ciklit artistik “Thesaret e Shpirtit”, një seri projektesh që synojnë të risjellin në vëmendje pasurinë tonë shpirtërore dhe trashëgiminë kulturore shqiptare përmes skenës moderne.
Një mbrëmje për nostalgjikët, për dashamirësit e traditës dhe për këdo që dëshiron ta përjetojë Tiranën ndryshe – me muzikë, ngjyra dhe emocion.
