Një propozim i ri nga administrata Trump po ngre shqetësime në mbarë botën: vizitorët e disa prej vendeve që udhëtojnë drejt SHBA-sё pa vizë mund të detyrohen të deklarojnë historinë e tyre të rrjeteve sociale për pesë vitet e fundit. Propozimi, i publikuar nga Shërbimi Amerikan i Doganave dhe Mbrojtjes së Kufirit, sugjeron që aplikantët e programit ESTA — sistemi elektronik që u lejon qytetarëve nga 42 shtete të udhëtojnë në SHBA pa vizё për deri 90 ditë — të dorëzojnë një sasi shumë më të madhe informacioni personal sesa më parë.
Aktualisht, aplikimi kërkon të dhëna bazë si numrin e pasaportës, datëlindjen dhe disa përgjigje mbi historikun e gjendjes gjyqёsore. Por me rregullin e ri, lista e kërkesave do të zgjerohej ndjeshëm: profilet e rrjeteve sociale, adresat e emailit dhe numrat e telefonit të përdorur gjatë pesë viteve të fundit, si dhe të dhënat e anëtarëve të afërt të familjes. Pyetja për rrjetet sociale ishte futur fillimisht në vitin 2016 si opsionale, por tani administrata kërkon ta bëjë atë detyruese.
Kjo lëvizje është pjesë e një tendence më të gjerë të Shtëpisë së Bardhë për të transformuar sistemin e emigracionit dhe për të shtrënguar kriteret e hyrjes në vend. Administrata Trump, përgjatë muajve të fundit, ka vendosur nën vëzhgim të fortë edhe studentët ndërkombëtarë, duke këshilluar ambasadat të shqyrtojnë qëndrimet e tyre publike në internet dhe “qëndrimet armiqësore” ndaj vlerave amerikane. Madje, mungesa e një profili publik mund të interpretohet si diçka e dyshimtë.
Edhe pse kërkesa për verifikim të rrjeteve sociale është vetëm një propozim i hapur për komente deri në muajin shkurt, ajo ngre një sërë pyetjesh të mëdha për privatësinë dhe standardet e reja të kontrollit në udhëtimet ndërkombëtare. Për shumë vizitorë nga Europa, Australia, Japonia apo vendet e tjera të përfshira në programin e udhëtimit pa vizë, kjo do të thotë se një pjesë e jetës së tyre virtuale mund të bëhet objekt vlerësimi nga autoritetet amerikane. Për qytetarët që udhëtojnë shpesh drejt SHBA-sё, mes tyre edhe shumë nga Ballkani që hyjnë me pasaporta të secilit prej 42 vendeve pjesё e sistemit ESTA, mesazhi është i qartë: postimet online nuk janë më private dhe mund të kenë pasoja në kufi.
Në thelb, SHBA po sinjalizon një ndryshim epokal: kufiri mes sigurisë kombëtare dhe mbikëqyrjes së jetës digjitale po bëhet më i hollë se kurrë. Një kërkesë e tillë, nëse miratohet, mund të krijojë precedent global dhe të hapë rrugën që edhe shtete të tjera të kërkojnë akses në historinë online të vizitorëve, duke transformuar plotësisht mënyrën se si vendet kontrollojnë hyrjen në territorin e tyre.
Ndërsa debati vazhdon, një gjë është e sigurt: epoka ku mjaftonte pasaporta për të udhëtuar drejt SHBA-sё po i afrohet fundit. Në të ardhmen, edhe një koment i vjetër në një rrjet social mund të bëhet objekt shqyrtimi në kufi.
(Burimi: CNN)
