Dollari amerikan u forcua ndaj euros të premten, ndërsa mbeti pothuajse i pandryshuar kundrejt jenit japonez, në një ditë kur bursat amerikane u rimëkëmbën pas rënieve të forta dhe tregjet po vlerësojnë mundësinë që Rezerva Federale të ulë normat e interesit në dhjetor.
Pas përfundimit të mbylljes së përkohshme së qeverisë amerikane, një sërë të dhënash ekonomike të shtyra pritet të publikohen javën e ardhshme, çka mund të rrisë ndjeshëm luhatshmërinë në tregje.
Zyrtarë të Fed-it kanë shprehur kujdes në lidhje me vazhdimin e lehtësimit monetar, për shkak të shqetësimeve për inflacionin. Aktualisht, kontratat e tregut po vlerësojnë vetëm rreth 41% gjasa për një ulje prej 0.25 pikë përqindje në dhjetor.
Indeksi i dollarit, që mat performancën e tij ndaj një shporte monedhash kryesore, u rrit me 0.07% në nivelin 99.31. Euro ra me 0.12% në 1.1617 dollarë. Ndërkohë, dollari kundrejt jenit ra lehtë me 0.02% në 154.52.
Sterlina ra ndjeshëm ndaj dollarit dhe euros, pasi raportimet mediatike – përfshirë Reuters – thanë se kryeministri britanik Keir Starmer dhe ministrja e Financave Rachel Reeves kanë hequr dorë nga planet për rritje të taksave të të ardhurave, vetëm pak javë para buxhetit të 26 nëntorit. Paundi u këmbye në rënie me 0.24% në 1.3158 dollarë, ndërsa euro arriti nivelin më të lartë kundrejt paundit që prej prillit 2023.
Në tregjet e tjera, dollari u fuqizua ndaj frangës zvicerane me 0.15% në 0.794, pasi më herët kishte rënë në nivelin më të ulët të një muaji, kur investitorët kërkuan siguri në frangë. Qeveria zvicerane njoftoi se SHBA do të ulë tarifat mbi mallrat e Zvicrës nga 39% në 15% nën një marrëveshje të re tregtare.
Në tregun e kriptovalutave, Bitcoin ra me 3.41% në 95,433 dollarë – niveli më i ulët që prej majit.
