Tensioni i lartë i gjakut, i njohur si hipertension, është një nga shkaqet kryesore të infarkteve, goditjeve në tru dhe sëmundjeve serioze kardiovaskulare. Për vite me radhë, mjekët janë përpjekur të mbajnë nën kontroll të dy numrat e matjes së tensionit: numrin qё tregon tensionin e lartё (sistolik) dhe numrin qё tregon tensionin e ulёt (diastolik). Por një studim i ri sugjeron se numri qё tregon tensionin e lartёmund të jetë shumë më vendimtar për trajtimin e hipertensionit.
Matja e tensionit përbëhet nga dy vlera. Numri sistolik tregon forcën me të cilën zemra pompon gjakun në arterie. Numri diastolik tregon presionin në arterie kur zemra pushon midis rrahjeve.
Deri tani besohej se të dyja vlerat duhet të qëndronin brenda kufijve të shëndetshëm. Por studimi i fundit sugjeron se fokusi kryesor duhet të jetë ulja e tensionit sistolik.
Studiues nga NUI Galway dhe institucione të tjera analizuan të dhënat shëndetësore të mbi 47 mijë personave nga e gjithë bota, për të kuptuar se çfarë ndodh kur tensioni ulet. Një nga pyetjet kryesore ishte nëse ulja e tepërt e tensionit diastolik mund të ishte e rrezikshme.
Rezultati ishte befasues: nuk u gjet asnjë provë që një diastolik i ulët është i dëmshëm. Kjo bie ndesh me bindjet tradicionale të shumë mjekëve.
Bazuar në këto gjetje, studiuesit sugjerojnë që mjekët duhet të synojnë ta mbajnë tensionin sistolik- tё lartё të pacientëve midis 100 dhe 130 mmHg, pa u shqetësuar aq shumë për tё ulёtin.
Ky përfundim mund të ndryshojë mënyrën se si trajtohet hipertensioni, duke ndihmuar në uljen e rrezikut për infarkt, goditje në tru dhe probleme të tjera kardiovaskulare.
Parandalimi mbetet po aq i rëndësishëm. Mbajtja e peshës normale, një dietë e shëndetshme me fruta, perime, proteina të pastra dhe drithëra integrale ndihmon në ruajtjen e tensionit normal. Kufizimi i kripës është thelbësor, pasi natriumi i tepërt rrit presionin e gjakut.
Aktiviteti fizik i rregullt forcon zemrën. Kufizimi i alkoolit, shmangia e duhanit dhe menaxhimi i stresit përmes jogës, meditimit ose frymëmarrjes së thellë janë po ashtu të dobishme.
Kontrollet e rregullta janë vendimtare, sepse hipertensioni shpesh nuk jep simptoma. Zbulimi i hershëm lejon trajtim në kohë dhe parandalon komplikacionet serioze.
Studimi, i udhëhequr nga Dr. Bill McEvoy dhe i botuar në revistën shkencore Circulation, mund të sjellë një qasje të re në trajtimin e tensionit të lartë: më shumë vëmendje te numri i sipërm – më shumë mbrojtje për zemrën.
(Burimi: Knowridge Science Report)
