Cilia Flores, bashkëshortja dhe këshilltarja më e afërt e presidentit venezuelian Nicolás Maduro, u arrestua së bashku me të në orët e para të së shtunës gjatë një operacioni amerikan në Venezuelë. Sipas burimeve të njohura me ngjarjen, çifti u nxor nga banesa e tyre nga trupa amerikane dhe u dërgua jashtë vendit për t’u përballur me akuza federale për trafik droge në Shtetet e Bashkuara.
E njohur nga mbështetësit e chavizmit si “luftëtarja e parë” (first combatant) – një term që zëvendëson rolin tradicional të “zonjës së parë” – Flores ka qenë për më shumë se tri dekada një figurë kyçe e pushtetit në Venezuelë dhe konsiderohej gjerësisht si gruaja më e fuqishme e vendit.
Nga lagjet punëtore te zemra e pushtetit
E lindur në vitin 1956 në Tinaquillo, në qendër të Venezuelës, Cilia Flores u rrit në njё lagje punëtorёsh të Karakasit perëndimor. Juriste me specializim në të drejtën e punës dhe penale, ajo u përfshi herët në rrethin e Hugo Chávez, duke ofruar ndihmë ligjore për të dhe për oficerë të tjerë ushtarakë të arrestuar pas grushtit të dështuar të shtetit në vitin 1992. Pikërisht në atë periudhë ajo u njoh me Maduron, atëherë aktivist i lëvizjes chaviste dhe pjesë e ekipit të sigurisë së Chávez-it.
Në një rrëfim publik në vitin 2023, Flores kujton se u impresionua nga inteligjenca e Maduros gjatë një takimi politik në lagjen Catia – një moment që shënoi fillimin e një partneriteti personal dhe politik që zgjati mbi 30 vjet.
Karrierë politike dhe polemika
Flores u zgjodh deputete për herë të parë në Asamblenë Kombëtare në vitin 2000, një vit pas ardhjes në pushtet të Chávez-it. Ajo u rizgjodh në 2005 dhe në vitin 2006 u bë gruaja e parë kryetare e parlamentit, duke pasuar Maduron, i cili u emërua ministër i Jashtëm.
Mandati i saj u shoqërua me polemika: ajo ndaloi hyrjen e gazetarëve në sallën e parlamentit dhe u kritikua ashpër për punësimin e dhjetëra familjarëve në administratën legjislative. Edhe pse i quajti akuzat “fushatë shpifjeje”, Flores pranoi punësimet, duke deklaruar se familjarët e saj ishin punësuar “mbi bazën e meritës”.
Më vonë, ajo shërbeu si zëvendëspresidente e dytë e Partisë Socialiste të Bashkuar të Venezuelës dhe, në vitin 2012, Chávez e emëroi Prokurore të Përgjithshme. Së bashku me Maduron, ajo e shoqëroi udhëheqësin chavist gjatë trajtimit të tij për kancer në Kubë, në muajt e fundit të jetës.
“Fuqia pas fronit”
Flores dhe Maduro u martuan në korrik 2013, pak pas fitores së Maduros në zgjedhjet presidenciale. Që prej asaj kohe, ajo uli dukshëm profilin publik, duke vepruar kryesisht pas skenës. Sipas politologëve, ajo ishte një mbështetje kyçe për Maduron në vitet e para të konsolidimit të pushtetit, kur chavizmi përjetonte përplasje të brendshme për trashëgiminë e Chávez-it.
Ekspertët theksojnë se ndikimi i Flores nuk ishte i institucionalizuar, por real. “Ajo ishte pushtet i padukshëm, por vendimtar,” vlerësojnë akademikët, duke shtuar se opinioni publik i perceptonte Maduron dhe Flores si një entitet të vetëm politik.
Sanksione, familje dhe akuza ndërkombëtare
Emri i saj u rikthye fuqishëm në vëmendje në vitin 2015, kur dy nipërit e saj u arrestuan nga DEA amerikane në Haiti dhe u dënuan në Nju Jork për komplot për import kokaine në SHBA. Ata u liruan në vitin 2022 në kuadër të një shkëmbimi të të burgosurve mes Karakasit dhe Uashingtonit.
Flores u sanksionua nga Kanadaja në vitin 2018, pas raportimeve për krime kundër njerëzimit nga qeveria Maduro, dhe më pas edhe nga Departamenti Amerikan i Thesarit. Në reagim, Maduro deklaroi publikisht: “Nëse doni të më sulmoni mua, mё sulmoni mua. Mos u merrni me Cilian.”
Pavarësisht kësaj, ajo u rikthye në institucione, duke u zgjedhur në Asamblenë Kushtetuese në 2017 dhe më pas deputete në Asamblenë Kombëtare në 2021 – post që mbante në momentin e arrestimit.
Figurë përçarëse
Edhe pse chavizmi pretendon mbrojtjen e të shtypurve, përfshirë gratë, analistët theksojnë se Flores nuk u dallua për agjendë feministe. Ajo mbeti besnike e vijës politike të lëvizjes dhe, ashtu si Maduro, u bë figurë thellësisht polarizuese.
Në vitet e fundit, propaganda zyrtare e paraqiti si figurë familjare dhe simbolike, përfshirë edhe një personazh vizatimor “Cilita”, krahas “SuperBigote” (SuperMusteqja) – alter egoja e animuar e Maduros. Gjatë fushatës presidenciale të vitit 2024, Flores shoqëroi të shoqin në aktivitete publike, duke kërcyer me të në skenë, në përpjekje për të zbutur imazhin e pushtetit.
Sot, arrestimi i saj dhe transferimi drejt Nju Jorkut shënojnë një kapitull të ri dramatik, jo vetëm për fatin personal të Cilia Flores, por edhe për historinë politike të Venezuelës dhe përplasjen e saj të gjatë me Shtetet e Bashkuara.
(Burimi: CNN)
