Legjenda e muzikës italiane, Adriano Celentano, ka vendosur të reagojë zyrtarisht pas pretendimeve të një 55-vjeçari, i cili deklaroi publikisht se është djali i tij, duke hapur një tjetër kapitull në një histori të vjetër që rikthehet pas dekadash.
Artisti i ka dhënë autorizimin avokates së njohur Giulia Bongiorno për të ndërmarrë hapa ligjorë dhe për ta mbrojtur nga, siç e cilëson ai, “çdo spekulim i mëtejshëm”.
Në një reagim të shkurtër në rrjetet sociale, Celentano shprehet me ironi: “Së pari nëna e supozuar, tani djali i supozuar”, duke kujtuar një episod të ngjashëm nga e kaluara.
Ai rikthen në vëmendje një çështje të viteve ’70, kur një grua kishte pretenduar se ai ishte babai i fëmijës së saj. Sipas tij, procedurat ligjore të asaj kohe nuk prodhuan asnjë rezultat, ndërsa padia u mbyll pasi gruaja nuk u paraqit më në gjykatë.
Tani, dekada më vonë, historia rikthehet me protagonist Antonio Maria Segatori, i cili në një intervistë për revistën “Oggi” pretendon se është djali i Celentanos dhe ka paraqitur një kërkesë për njohjen e atësisë në Gjykatën Civile të Milanos.
Përballë kësaj situate, Celentano ka zgjedhur të mos heshtë, duke kërkuar mbrojtje ligjore dhe duke lënë të kuptohet se nuk do të lejojë që çështja të përdoret për vëmendje publike.
Rasti pritet të marrë zhvillime të mëtejshme në gjykatë, ndërsa mbetet për t’u parë nëse pretendimet e reja do të sjellin një përfundim të ndryshëm nga ai i më shumë se gjysmë shekulli më parë.
(Burimi: ANSA)
