Kuvendi i Shqipërisë zhvillon sot, më 6 nëntor 2025, në orën 10:00, seancën plenare, sipas kalendarit të punimeve për periudhën 20 tetor – 7 nëntor. Seanca nis me miratimin e procesverbaleve të mbledhjeve të mëparshme dhe njoftime procedurale, për të vijuar më pas me një rend dite të ngarkuar, ku vëmendja do të përqendrohet tek raportet vjetore të disa institucioneve të rëndësishme të shtetit.
Në seancë do të paraqiten raportet e veprimtarisë për vitin 2024 të Kontrollit të Lartë të Shtetit, Departamentit të Administratës Publike, Komisionit të Prokurimit Publik, si dhe të Autoritetit për Informimin mbi Dokumentet e Ish-Sigurimit të Shtetit. Këto institucione pritet të bëjnë një përmbledhje të punës së tyre gjatë vitit të kaluar, duke paraqitur gjetjet dhe rekomandimet për përmirësimin e transparencës, eficiencës dhe zbatimit të ligjit në administratën publike.
Pas raportimeve, Kuvendi do të shqyrtojë disa projetkligje që vijnë si propozim i qeverisë, e që lidhen me fushën e ndërtimit, planifikimit të territorit, mbrojtjes nga ndërtimet e paligjshme dhe ndryshime në ligjin për buxhetin e vitit 2025. Gjithashtu, në rend dite është projektligji për miratimin e buxhetit faktik të vitit 2024, si dhe projektligji “Për barazinë gjinore”, një nismë që sipas relacionit synon forcimin e parimeve të barazisë në jetën publike dhe profesionale, por që është kundërshtuar shumë nga opinioni publik dhe komunitetet fetare.
Deputetët do të shqyrtojnë gjithashtu një shtesë në ligjin “Për gjendjen civile”, si dhe projektvendimin për miratimin e raportit të Komisionit për Çështjet Ligjore dhe Administratën Publike lidhur me mosngritjen e komisionit hetimor për shkarkimin e Presidentit të Republikës, Bajram Begaj.
Pritet që seanca e sotme të shoqërohet me debate të forta në sallën e Kuvendit, veçanërisht gjatë shqyrtimit të raportit të Kontrollit të Lartë të Shtetit dhe atij të Komisionit të Prokurimit Publik. Gjetjet e KLSH-së për vitin 2024, që pritet të evidentojnë problematika në përdorimin e fondeve publike dhe në zbatimin e procedurave të prokurimit, me siguri do të ngjallin diskutime të gjera mes mazhorancës dhe opozitës. Debatet pritet të përqendrohen tek shifrat që tregojnë mënyrën e prokurimit apo të nxjerrin në pah shpenzime të pajustifikuara, duke e kthyer këtë seancë në një seancë maratonë diskutimesh.
