Në seancën plenare të së enjtes, Kuvendi i Shqipërisë miratoi dy emërime të rëndësishme institucionale, duke plotësuar strukturat drejtuese të Autoritetit të Mbikëqyrjes Financiare (AMF) dhe të Komisionerit për Mbikëqyrjen e Shërbimit Civil. Procesi u shoqërua me kritika nga opozita lidhur me mungesën e transparencës dhe konsultimit publik.
Me 78 vota pro, u miratua emërimi i Adela Xhemalit në postin e Drejtoreshës së Përgjithshme Ekzekutive të Autoritetit të Mbikëqyrjes Financiare. AMF është institucioni që mbikëqyr tregjet financiare jobankare — përfshirë sigurimet, pensionet private dhe letrat me vlerë — duke luajtur rol kyç në stabilitetin financiar dhe mbrojtjen e konsumatorëve.
Ndërkohë, me 79 vota pro, Kuvendi zgjodhi Lefterie Lleshi Luzin si Komisionere për Mbikëqyrjen e Shërbimit Civil për një mandat 5-vjeçar. Ky institucion garanton zbatimin e ligjit për statusin e nëpunësit civil dhe mbikëqyr proceset e rekrutimit, disiplinës dhe karrierës në administratën publike.
Dy emërimet u bënë në një seancë të gjatë maratonë, në të cilën janë miratuar edhe 13 projektligje të tjera. Opozita deklaroi se shumica po e trajton procesin e emërimeve në institucionet e pavarura thjesht si formalitet, ndërsa mazhoranca këmbënguli se procedurat kanë qenë të rregullta dhe brenda afateve ligjore.
Megjithatë, pavarësisht procedurës formale të ndjekur në Kuvend, mbetet fakt se si AMF, ashtu dhe Komisioneri për Mbikëqyrjen e Shërbimit Civil — janë struktura që ligjërisht duhet të jenë plotësisht të pavarura, neutrale dhe të shkëputura nga ndikimi politik, për të ushtruar kompetencat e tyre mbikëqyrëse dhe rregullatore. Emërimi i Adela Xhemalit dhe Lefterie Lleshi Luzit, figura të njohura për lidhjet e tyre politike, e thellon perceptimin se pavarësia e këtyre institucioneve është cenuar, duke e kthyer procesin në një vendimmarrje të mbyllur dhe të kontrolluar politikisht, larg standardeve të transparencës dhe meritokracisë që kërkon legjislacioni.
