Aktori Alfonso Ribeiro ka ndarë një moment thellësisht emocional nga orët e fundit të mikut të tij të ngushtë, James Van Der Beek, i cili u nda nga jeta në moshën 48-vjeçare pas një beteje dyvjeçare me kancerin kolorektal.
Përmes një postimi në Instagram, Ribeiro publikoi një foto të realizuar vetëm pak minuta para se t’i jepte lamtumirën e fundit yllit të serialit “Dawson’s Creek”. “Kjo është bërë nga @vanderkimberly vetëm pak minuta para se të thoja lamtumirën time të fundit”, shkroi ai, duke zbuluar se momentet e fundit mes tyre nuk ishin vetëm dhimbje, por edhe të qeshura. “Momenti im i fundit ishte ta bëja të qeshte edhe një herë të fundit”, shtoi aktori.
Në imazhin prekës, Ribeiro shihet duke mbajtur kokën e Van Der Beek ndërsa ai qëndron i shtrirë në shtrat. Vetëm disa orë pas lajmit të hidhur, ai ndau edhe një foto tjetër të të dyve krah për krah jashtë, ku Van Der Beek dukej i shëndetshëm dhe plot energji.
“Jam shumë i thyer tani me ndarjen nga jeta të mikut tim. Ai ishte miku im i vërtetë, vëllai dhe udhërrëfyesi im në jetë,” shkroi Ribeiro, duke theksuar se kishte qenë pranë tij gjatë gjithë luftës me sëmundjen. Ai e përshkroi këtë periudhë si një “udhëtim të tmerrshëm”, me ngritje shprese dhe rikthime të papritura të sëmundjes.
Van Der Beek lë pas bashkëshorten Kimberly dhe gjashtë fëmijët e tyre: Olivia (15), Joshua (13), Annabel (12), Emilia (9½), Gwendolyn (7) dhe Jeremiah (4). Ribeiro është gjithashtu kumbari i Gwendolyn dhe u zotua se do të jetë gjithmonë pranë familjes së mikut të tij. “Do ta konsideroj gjithmonë rolin tim si babai i Gwen-it si një nga më të rëndësishmit në jetën time,” shkroi ai.
Humbja e aktorit ka prekur thellë Hollywood-in. Shumë kolegë nga “Dawson’s Creek”, përfshirë Katie Holmes, kanë publikuar homazhe emocionale në rrjetet sociale.
Ndërkohë, është hapur edhe një faqe GoFundMe për të mbështetur financiarisht familjen, me një objektiv fillestar prej 500 mijë dollarësh. Kimberly falënderoi publikisht miqtë që krijuan nismën, duke shkruar se mbështetja do të ndihmojë në përballimin e shpenzimeve të jetesës, faturave dhe arsimimit të fëmijëve.
“Të dua James dhe e di që kam një engjëll mbrojtës që më ruan… U prehsh në paqe, vëllai im,” përfundoi Ribeiro në mesazhin e tij prekës.
(Burimi: Daily Mail)
