Shmangia e ushtrimeve fizike është një realitet për shumë njerëz, sidomos në muajt e dimrit kur ditët janë të shkurtra, të ftohta dhe motivimi bie ndjeshëm. Edhe pse çdo fillim viti shoqërohet me premtime për një jetë më aktive, një pjesë e madhe e atyre që vendosin objektiva për aktivitet fizik i braktisin ato brenda javëve të para. Sipas të dhënave të publikuara së fundmi, shumë persona heqin dorë nga rezolutat që në janar, ndërsa synimet që lidhen me shëndetin, si ushtrimet fizike, janë ndër më të braktisurat.
Psikologia Diana Hill, në një bisedë me gazetarin mjekësor Sanjay Gupta në podkastin “Chasing Life”, thekson se problemi nuk lidhet me mungesën e informacionit. Shumica e njerëzve e dinë se lëvizja ul rrezikun e sëmundjeve, përmirëson shëndetin mendor dhe ndikon në jetëgjatësi. Megjithatë, vetëm një pjesë e vogël e popullsisë arrin të jetë fizikisht aktive në mënyrë të rregullt. Sipas saj, pengesat më të mëdha janë psikologjike: justifikime si “nuk kam kohë” apo “jam lodhur gjithë ditën” shpesh fshehin barriera të brendshme emocionale.
Hill sugjeron se një nga arsyet kryesore është mënyra si e perceptojmë kohën. Shumë e konsiderojnë aktivitetin fizik si diçka që duhet bërë vetëm në kohën e lirë, duke e vendosur përballë detyrimeve të tjera. Ajo propozon një ndryshim këndvështrimi: ushtrimet mund të integrohen në rutinën e përditshme, qoftë duke zgjedhur shkallët në vend të ashensorit apo duke e kthyer pritjen në aeroport apo në park në mundësi për lëvizje.
Një tjetër element kyç është motivimi personal. Për disa, arsyeja mund të jetë shëndeti pas një problemi serioz; për të tjerë, dëshira për të kaluar më shumë kohë cilësore me familjen. Sipas Hill, motivimi nuk është konstant, por luhatet si valë, ndaj është e rëndësishme të lidhemi me arsyet tona të brendshme dhe jo vetëm me objektiva të përgjithshme si “dua të jem më në formë”.
Ekspertët theksojnë se për të ruajtur vazhdimësinë, duhet të shmanget perfeksionizmi. Nuk është e nevojshme një program i ndërlikuar apo orë të gjata në palestër. Edhe hapa të vegjël dhe të qëndrueshëm, si një shëtitje e përditshme apo disa minuta ushtrime në shtëpi, mund të krijojnë një zakon të ri. Çelësi qëndron në kapërcimin e justifikimeve mendore dhe në ndërtimin e një marrëdhënieje më të shëndetshme me lëvizjen.
Sipas specialistëve, motivimi kultivohet. Duke e parë aktivitetin fizik jo si detyrim, por si pjesë natyrale të ditës, mund të rrisim gjasat për ta kthyer atë në zakon afatgjatë, edhe në ditët më të zymta të vitit.
