Ekipi i Taylor Swift nuk i mbajti dot emocionet kur mësoi se superylli amerikan kishte vendosur t’i shpërblente me 197 milionë dollarë bonuse për punën e tyre në turneun gjigant “Eras Tour”. Momentet prekëse, ku shumë prej tyre shpërthejnë në lot, shfaqen edhe në dokumentarin e saj të ri në Disney+, Taylor Swift: The Eras Tour / The End of an Era.
Taylor Swift, 36 vjeç, hyri në histori me turneun 21-mujor që përfshiu 149 koncerte në 21 vende, duke gjeneruar një shifër rekord prej mbi 2 miliardë dollarësh nga shitja e biletave. Si shenjë mirënjohjeje, ajo vendosi të ndajë një pjesë të konsiderueshme të fitimeve me njerëzit që qëndruan pas skenës dhe e bënë të mundur suksesin e jashtëzakonshëm të turneut.
Bonuset iu dhanë një game shumë të gjerë profesionistësh: shoferëve të kamionëve, stafit të ushqimit, teknikëve të instrumenteve, ekipit të ndriçimit dhe zërit, stafit të prodhimit, zdrukthëtarëve, valltarëve, muzikantëve, koreografëve, ekipit të sigurisë, piroteknikëve, montuesve, stilistëve të flokëve dhe grimit, ekipit të veshjeve, fizioterapistëve dhe stafit të videos. Së bashku me bonuset, shumë prej tyre morën edhe shënime personale nga këngëtarja.
Ky gjest nuk është i pari i këtij lloji për Swift. Dy vite më parë u raportua se ajo kishte shpërblyer shoferët e kamionëve të turneut amerikan me 100 mijë dollarë secilin, një shumë që në total kapte mbi 5 milionë dollarë, duke qenë se rreth 50 shoferë ishin të përfshirë në transportin e pajisjeve.
Së fundmi, gjatë një interviste në “The Late Show with Stephen Colbert”, Taylor pranoi se fitimet nga “Eras Tour” i mundësuan një arritje shumë personale: rikthimin e të drejtave mbi regjistrimet e saj muzikore. “Ja si i shpenzova paratë e Eras Tour. Fansat e mi janë arsyeja pse arrita ta rimarr muzikën time,” tha ajo.
E ftuar për të promovuar dokumentarin e ri, Swift u shpreh gjithashtu se turneu ndryshoi jetën e saj edhe në planin personal. Ajo tregoi se, pa suksesin e “Eras Tour”, ndoshta nuk do të kishte takuar kurrë të fejuarin e saj, Travis Kelce, apo nuk do të kishte pasur mundësinë të blinte katalogun e saj muzikor. Çifti konfirmoi romancën pasi Taylor u shfaq në një ndeshje të Kansas City Chiefs, ndërsa fejesa u bë publike në gusht, pas dy vitesh lidhje.
“Fejesa me dashurinë e jetës sime dhe rikthimi i muzikës sime janë dy gjëra që mund të mos kishin ndodhur kurrë,” tha Swift. “Jam thellësisht mirënjohëse që të dyja u bënë realitet.”
Turneu “Eras Tour” zgjati nga 17 marsi 2023 deri më 8 dhjetor 2024, plot 632 ditë, duke u shndërruar jo vetëm në turneun më fitimprurës në histori, por edhe në një shembull të rrallë të ndarjes së suksesit me gjithë ekipin që qëndron pas yllit në skenë.
(Burimi: Daily Mail)
