Mijëra persona u mblodhën në Stonehenge, monumentin e famshëm pranë Salisbury, për të festuar solsticin e dimrit, ditën më të shkurtër të vitit. Turma u grumbullua në errësirë rreth sitit historik në Wiltshire për të ndjekur lindjen e diellit, një moment me rëndësi të veçantë simbolike që lidhet me ciklet e natyrës dhe kalimin e stinëve.
Shumë prej pjesëmarrësve ishin veshur me kostume tradicionale që të kujtonin ritualet e lashta kelte, ashtu siç ndodh edhe gjatë festimeve të solsticit të verës. Ritualet e zhvilluara ishin një ndërthurje e folklorit dhe rikrijimeve historike, duke krijuar një atmosferë unike mes gurëve mijëravjeçarë. Gjatë solsticit të dimrit, dielli ndodhet në pikën më të ulët të tij në qiell gjatë gjithë vitit dhe rrezet e para mund të shihen duke kaluar përmes harqeve juglindore të monumentit.
“Ka një atmosferë fantastike këtu, me kaq shumë njerëz të ndryshëm”, citohet të ketë thënë një nga pjesëmarrësit, sipas The Guardian. Stonehenge, një monument neolitik i përbërë nga gurë dhe struktura henge, është pjesë e Trashëgimisë Botërore të UNESCO-s dhe përfaqëson një nga simbolet më të rëndësishme të historisë dhe kulturës britanike, si edhe një nga atraksionet më të njohura turistike të vendit.
(Burimi: ANSA/ The Guardian)
