Zëvendësprokurori i Përgjithshëm i Shteteve të Bashkuara, Todd Blanche, ka bërë të ditur se gjatë shqyrtimit të dokumenteve që lidhen me çështjen e Jeffrey Epstein janë identifikuar më shumë se 1,200 viktima, emrat e të cilave janë redaktuar ose lënë jashtë materialeve të publikuara. Në një deklaratë për mediat amerikane, Blanche theksoi se autoritetet kanë censuruar jo vetëm emrat, por edhe çdo informacion tjetër që mund të çojë drejtpërdrejt ose tërthorazi në identifikimin e viktimave, me qëllim mbrojtjen e privatësisë dhe sigurisë së tyre.
Dosjet e bëra publike përfshijnë qindra fotografi, shumë prej të cilave nuk janë parë kurrë më parë. Sipas raportimeve të mediave amerikane, një pjesë e imazheve tregojnë Epstein dhe bashkëpunëtoren e tij, Ghislaine Maxwell, gjatë udhëtimeve dhe pushimeve.
Megjithatë, materialet janë publikuar pa kontekst shpjegues, çka i bën të vështira për t’u interpretuar. Disa fotografi paraqesin ambiente banimi, por nuk është e qartë se cilat prona i përkisnin vetë Epstein-it, i cili kreu vetëvrasje në burg në vitin 2019 ndërsa priste gjyqin për trafikim seksual.
Në dokumente përfshihet edhe e ashtuquajtura “Lista e Masazhatoreve”, një regjistër me 254 emra të personave të dyshuar si “masazhatore”. Edhe kjo listë është e redaktuar plotësisht, duke mos lejuar identifikimin e asnjë individi. Po ashtu, janë publikuar disa regjistrime telefonike të redaktuara, të cilat nuk sqarojnë se kush komunikonte me kë, duke kufizuar ndjeshëm vlerën e tyre për publikun.
Departamenti amerikan i Drejtësisë ka krijuar në faqen e tij zyrtare atë që e quan një “biblioteka gjithëpërfshirëse Epstein”, ku janë përmbledhur dokumente nga burime të ndryshme. Këto përfshijnë materiale nga çështjet penale dhe civile, dokumente të publikuara në bazë të një ligji të miratuar nga Kongresi dhe të nënshkruar nga Donald Trump, si dhe materiale të siguruara pas kërkesave për qasje në të dhënat publike dhe dokumente nga House Oversight Committee.
Autoritetet amerikane theksojnë se publikimi i këtyre materialeve synon transparencë institucionale, por pa cenuar dinjitetin dhe mbrojtjen ligjore të viktimave, të cilat mbeten në qendër të një prej çështjeve më të ndjeshme dhe tronditëse të viteve të fundit.
(Burimi: ANSA)
