Mbreti Charles III i Britanisë ka ndarë një rrëfim të rrallë mbi përballjen e tij me kancerin, duke njoftuar se vitin e ardhshëm trajtimi mjekësor do të reduktohet, pasi organizmi i tij ka reaguar shumë mirë ndaj kurave.
Në një videomesazh të transmetuar të premten në mbrëmje, monarku 77-vjeçar e përshkroi këtë fazë të rimëkëmbjes si “një bekim personal”, duke vlerësuar njëkohësisht “përparimet e jashtëzakonshme që janë bërë vitet e fundit në kujdesin ndaj kancerit”.
“Sot jam në gjendje të ndaj me ju lajmin e mirë se, falë diagnozës së hershme, ndërhyrjes efektive dhe respektimit të ‘urdhrave të mjekut’, periudha e trajtimit të kancerit mund të reduktohet vitin e ardhshёm”, tha Mbreti Charles në një klip të transmetuar për emisionin “Stand Up To Cancer” të Channel 4, i cili zhvillohet në bashkëpunim me organizatën bamirëse Cancer Research UK.
Mbreti njoftoi se ishte diagnostikuar me kancer në shkurt të vitit 2024, pas një ndërhyrjeje kirurgjikale në prostatë. Edhe pse trajtimi nuk ka përfunduar ende, një zëdhënës i Pallatit Mbretëror i tha CNN se “Madhëria e Tij i është përgjigjur jashtëzakonisht mirë trajtimit”.
Zëdhënësi shtoi se kjo gjendje “do të monitorohet dhe rishikohet vazhdimisht, për ta mbrojtur dhe për t’i dhënë përparësi shërimit të tij të vazhdueshëm”.
Në videomesazhin e filmuar në rezidencën e tij londineze Clarence House në fund të nëntorit, Mbreti Charles reflektoi mbi momentin kur ishte njohur me diagnozën. Ai pranoi se mesazhi i tij “mund të duket i përsëritur”, por theksoi se zbulimi i hershëm është thelbësor, pasi mund të transformojë rrugëtimin e trajtimit dhe t’u japë pacientëve “dhuratën e çmuar të shpresës”.
Ai vuri theksin te rëndësia e programeve të depistimit të kancerit dhe i inkurajoi qytetarët t’i shfrytëzojnë ato, duke theksuar se “diagnoza e hershme thjesht shpëton jetë”.
“Shumë shpesh, më thuhet se njerëzit e shmangin kontrollin sepse mendojnë se është i frikshëm, i sikletshëm ose i pakëndshëm. Por, kur më në fund e pranojnë ftesën, janë të kënaqur që e kanë bërë”, tha ai, duke prezantuar edhe një program të ri kombëtar online për depistimin e kancerit në Mbretërinë e Bashkuar.
Sipas Mbretit, ky mjet u lejon qytetarëve të kontrollojnë nëse kualifikohen për depistimin e kancerit të gjirit, zorrëve apo qafës së mitrës, duke e thjeshtuar procesin, duke iu përgjigjur pyetjeve dhe duke i udhëzuar drejt hapit të duhur.
Charles u shpreh gjithashtu se gjatë betejës së tij me sëmundjen është “prekur thellësisht” nga ajo që e quajti “komuniteti i kujdesit” që rrethon çdo pacient me kancer.
Ai e përfundoi mesazhin me falënderime të veçanta për mjekët, infermierët, studiuesit dhe punonjësit e organizatave bamirëse, si dhe me urime për pacientët që ata mbështesin çdo ditë me përkushtim.
Mbreti kishte ndarë më herët një mesazh personal edhe gjatë një pritjeje në Pallatin Buckingham në prill, ku vlerësoi punën e organizatave bamirëse për kancerin, duke thënë se, pavarësisht frikës që mund të shkaktojë kjo sëmundje, ajo shpesh nxjerr në pah më të mirën e njerëzimit.
Dalja e tij publike vjen në një kohë kur Mbreti Charles është emëruar mbështetës i ri i Cancer Research UK, ndërsa ka qenë për gati tre dekada një mbështetës aktiv i Macmillan Cancer Support.
“Ai ka vizituar spitale, ka takuar pacientë dhe ka shkuar në qendra mbështetëse. Ka ruajtur gjithmonë kontaktin me njerëzit,” u shpreh një përfaqësuese për CNN. “Mendoj se ai ndien një lidhje të veçantë me ta dhe fakti që e ndan këtë përvojë tregon se kanceri mund të prekë këdo, pavarësisht se kush je.”
(Burimi: CNN)
